30
Ebibono bya Aguli
1 Ebibono bya Aguli omusaani wa Yake owʼe Maasa ebi galomera Yisiyeeli ni Wukali ati:
2 Ndi muŋubeebe bugali ohusinga abaatu bosibosi,
mbulaamo habuutu era sitegeera.
3 Simbangaho mugesi
era ŋaŋuma ehi manyire ebiŋamba hu Hatonda.
4 Njʼani owatiinaho mwigulu nindi gagobola?
Njʼani owahumbaaniaho embeŋo mu ngalo jije?
Njʼani afumbirangaho amaaji mu lugoye lulwe gasigalamo?
Njʼani owataŋo esalo hu hyalo?
Esiina lirye njʼani era omusaani wuwe njʼani?
Ndomere nʼoba nʼomumanyire!
5 Hiisi ehi Hatonda aloma hituufu
era Hatonda oyo njʼengabo yʼabo abeŋogoma mu ye.
6 Someedanga hu bibono bibye,
nʼoja huhihola aja huhwaniha alage abaatu ngʼolu oli mudulingi.
7 O Hatonda, kusunga wuupe ebiitu bibiri ni kiiri mulamu:
8 Njeede taba mudulingi
era otandeha huba mugadi bugali oba ohuba omuŋinda
aye pe ebyo ebiikena.
9 Hiri hiityo olwohuba singa mba muŋinda ohubitiirira
sobola ohuhwegana naloma ti,
“Ko Musengwa njʼani?”
Oba naaba mugadi bugali nahanda niiba nʼohwiba naswasa Hatonda wange.
10 Sogeyanga mwidu eyiri musengwawe
omwidu oyo aja huhucaawa era osune ebigosi.
11 Ŋaliŋo abaatu ababisya bubi abasaawe
era sibasiima banyinaawe,
12 abo beranga bagwalaafu
atenga ko bejuuye bubi wereere,
13 abo abebona baati baŋamugulu ohuhira abandi,
14 abo abatambisa obuhambwe waawe
ohutulugunya abagadi nʼabatesobola
basobole ohwesunira ehinabemereseŋo.
15 Omuutu owʼomuluulu ali nʼabaana babiri
era bombi babalanga baati, “Peeho, peeho.”
Ŋaliŋo ebiitu bidatu ebitaŋerwa
biri bine ebitaloma biiti, “Ehyo hihena.”
16 Era ebiitu ebyo mbebino: amagombe
nʼehida hyʼomuhasi omugumba,
nʼeroba eritaŋerwa maaji
ko nʼomuliro ogutaloma guuti, “Ehyo hihena.”
17 Abo abanyooma saawe oba abatala nyinaawe
esega jigwene jibalye oba jibomolemo emoni.
18 Ŋaliŋo ebiitu bidatu ebinjeŋunjisa
bine ebikayire ohutegeera:
19 engeri eyi haŋungu agululuhamo mu bbanga,
engeri eyi musota gweŋalulira mu gabaale,
engeri eyi emeeri yiyererehamo hu nyanja,
nʼengeri eyi musinde ahobyamo omuhasi!
20 Ebikolwa byʼomuhasi omuhwedi biri biiti,
ahena ohulya nga gesabuusa hu munwa aloma ati,
“Puma hibi ehi kolire.”
21 Ŋaliŋo ebiitu bidatu ebiteetemya ehyalo
bine ebi hitasobola hubigumikiriza:
22 omwidu ohufuuha habaha
nʼomuŋubeebe ohuba ni hiisi ehi genda,
23 nʼomuhasi owadiba ohuba mufumbo
nʼomuhasi omwidu ohuleetera musengwawe ohunoba.
24 Hu hyalo huno huliho nʼebiitu bine ebitootono
aye mu magesi sibisoboha.
25 Amage gali nʼamaani matootono
aye gebiihira emere gerindiisa endobooli.
26 Nawangeye hasolo ahali nʼamaani matootono
aye hamenya mu mabaale.
27 Esige jiŋuma habaha
aye jigendera mu nyiriri hyʼamaŋe.
28 Ahapunu haatu hatootono era osobola ohuhaŋamba nʼengalo
aye ohasaŋaana mu lubiri lwa habaha.
29 Ŋaliŋo ebiitu bidatu oba bine ebisangaasa ohubona ni bigenda:
30 epologoma yʼamaani ohuhira esolo josijosi
era siyitya wayire ndala hu solo jahye,
31 engoho edwaya yiri nʼolwerago,
embusi epaya
ko ni habaha nʼali nʼeŋe lirye ni limweswanigirihiise.
32 Nʼoba nʼobaaye muŋubeebe era ni wepaahapaaha
oba nʼotegehire ohuhola ehibi
ohuŋwa ŋaahani, yegoboleeho.
33 Ohusaja amabeere gaŋwamo omuzigo
era onahubba esuulu yituluha amafugi
nʼobusungu buŋweramo omuutu ohuduhana.