31
1 Ebibono bya habaha Lamweli ebi nyina gamusomesa ati:
2 “O mwana wase!
O mwana owomu mala gange,
omwana oyu nasaba ko nahusaala,
olwʼehyo pulirise.
3 Soheneranga maani gago hu bahasi
basihiirihise abahabaha.
4 O Lamweli wange
sihiraŋi abahabaha ohunywa omwenge
oba abaŋugi ohuŋemba hu himeesa
5 olwohuba ni banywa berabira amagambi,
basigalaŋo ni banyigirisa abagadi.
6 Omwenge oguŋanga abo abadembereye
abo abaŋuma suubi mu bulamu waawe.
7 Leha banywe berabire obugadi waawe
era batahebulira bigosi ebi bali ni nabyo.
8 Banga janjaasi lyʼabo abatasobola hweromereraho
era osolererenga abo abaŋuma abayeeda.
9 Banga janjaasi era obe mulamuzi atehubbira
solehereranga abagadi nʼabali mu wetaavu.”
Omuhasi owʼesambo endaŋi
10 Njʼani asobola ohuvumbula omuhasi owʼesambo endaŋi?
Omuhasi hyʼoyo wamuŋendo,
ohuhira amabaale agebbeeyi bugali.
11 Wamwe amwesigira erala
era ŋaŋumaaŋo ehyʼomuŋendo ehi aŋuma.
12 Omuhasi oyo aholera wamwe ebiraŋi byereere
era ŋaŋuma hibi ehi amwosaho mu bulamu wuwe wosiwosi.
13 Afululuhana nʼengalo jije gatunga engoye
ohuŋwa mu mooya gʼetaama ko nʼeja laasi.
14 Era omuhasi oyo ali hyʼemeeri,
eyireeta emere ohuŋwa engereha wʼenyanja.
15 Genyoha mu mugamba pwipwipwi,
gategehera amago gage emere
era galaabbira abaŋeeresa babe abahasi ehyʼohuhola.
16 Nʼabona ehibanja gahyegomba ahigula
era atambisa ebbeesa jije ngʼahomaamo emizabbibbu.
17 Ali nʼamaani era mutambi wʼemirimo
emihono jije simidoto.
18 Gefaaho ohubona ati hiisi ehi ahola himuleetera amagoba
era ahola ohwirisa owiire.
19 Getungira engoye jije omwene.
20 Ali nʼehyere eyiri abagadi
era ayeeda abali mu wetaavu.
21 Mu biseera ebyʼobuŋololohi obubitiirifu niye saatya
olwohuba abomu mago gage bosibosi bali nʼebyambalo ebyʼembeŋo.
22 Omwene getungira amasuuka
era gambala engoye eja laasi nʼeja namasyoma.
23 Wamwe amanyiheene bugali
era ngʼomutangirisi, abaatu bamuŋa eŋono mu hibuga.
24 Omuhasi oyo atunga engoye eja laasi ko nʼemisibiro ngʼajitunda
agusa abasubuuzi.
25 Wʼamaani era abaatu bamuŋa eŋono
saatya ehiija mu moni.
26 Aloma nʼamagesi agʼehikugu
era alaga ehisa nʼabuulirira.
27 Alabirira abomu mago gage
era saŋuuna hulera ngalo.
28 Abaana babe basiima ebi ahola
era wamwe amusiima, gamutenderesa.
29 Amuloma ati, “Eriyo abahasi bangi abaholire ebiitu ebyʼamaani hu hyalo huno
aye ewe obahira bosibosi!”
30 Emboneha yʼomuhasi yisobola ohuhudulinga era obuŋoono wuwe buŋwaŋo
aye omuhasi atya Musengwa bamuŋenga eŋono.
31 Mumuŋe omuhemba
era olwʼebiitu ebi aholire,
mumuŋenga eŋono mu lwijuuye.