3
1 Mwana wase, siwibiriranga ebi kusomesa
aye ohuumanga ebiragiro byange mu mwoyo gugwo,
2 olwohuba bija huhuleetera ohuwangaala emyaha nʼemyaha
nʼobulamu owʼemiyaaya.
3 Ohwenda nʼowesigwa sibihuŋwangamo.
Obyesidihanga mu mamiro gago
era obiŋandihanga hu mwoyo gugwo.
4 Ehyo hija huhuleetera ohuba muhoda ko nʼesiina eraŋi
mu moni ja Hatonda nʼabaatu.
5 Wesige Musengwa nʼomwoyo gugwo gwosigwosi,
era otesiganga magesi gago huwuwo.
6 Mu hiisi ehi ohola omuhebuliranga
era aja huhuluŋamyanga mu ngira enduŋamu.
7 Otefuulanga huba mugesi,
aye tyanga Musengwa, weŋalenga ohuhola ehibi.
8 Ehyo njʼehija hubanga obulesi obuŋonia omubiri gugwo
era ehiŋangasa amagumba gago.
9 Oŋanga Musengwa eŋono nʼomuŋa hu bibyo,
hu bidaayi mu huhungula,
10 ko ebyagi bibyo bijulenga nohu muniga
era ebi obiihamo bijulenga omwenge ogwomu mizabbibbu.
11 Mwana wase sonyoomanga Musengwa anahuŋamo endabusi
era otaŋwangamo maani nʼahunenya,
12 olwohuba oyo oyu Musengwa genda amuŋamo endabusi
ngʼolu omusaaye ahangavula omwana wuwe omuhoda.
13 Gesiimire oyo asuna amagesi
omuutu oyo asuna ohutegeera,
14 olwohuba amagesi gamuŋendo bugali ohusinga efeeza
era ebigaŋwamo bisinga nʼezaabbu.
15 Amagesi gamuŋendo ohusinga amabaale agʼomuŋendo
era ŋaŋuma ehi osobola ohuŋembaho ohusuna ehisinga amagesi.
16 Amagesi gahuleetera ohuwangaala,
nʼohuba nʼobuŋinda nʼeŋono.
17 Amagira gaago gasangaasa
era gosigosi ga miyaaya.
18 Amagesi gali hyʼomusaala oguleeta obulamu eyiri abageeŋa
era besiimire abo abatagaŋwaho.
19 Musengwa gatambisa amagesi ohutonda ehyalo
era gatonda egulu olwʼohutegeera huhwe.
20 Olwʼobumanyi wuwe, agayanja geyawula
nʼebireri byatonyesa efula hu hyalo.
21 Mwana wase, otaganya huleha magesi nʼohutegeera
era byeŋambeeho hyʼobulimbo.
22 Amagesi gaja huhuleetera ohuba nʼobulamu,
hyʼehihomo mwigosi ehi ŋeesa eŋono.
23 Aŋo oligenda bulaŋi mu lugendo lulwo,
nʼeŋuma hwegumula.
24 Nʼonaŋenyuhenga hu buliri wuwo, oja huŋuma ehi otya
era onaŋenyuhenga ero lyahuŋoomera.
25 Sooja hweŋendehereranga ebigwa ni bitalagire,
oba ohusihiiriha ohujira abahosi bʼebibi,
26 olwohuba Musengwa aja huhuhuumanga
era aja huhuhingirisanga otagwa mu mitego.
27 Otagaananga huŋa muutu yesiyesi
obuyeedi ni hiba ni hiŋangiha.
28 Solomanga muliranwawo oti,
“Onahagaluhe ejo nahuyeeda,”
atenga ko oli nahyo aŋo ehi genda.
29 Sotegehanga hwosa hu wahyo obugosi
naali ni neewe miyaaya.
30 Sobeŋeranga muutu aŋaŋuma songa
era aŋaŋuma ehi ahuholire.
31 Otegombanga muutu owetima
wayire ohuhola ebi ahola
32 olwohuba Musengwa
acaawa abahola ebibi
aye abahola ebiraŋi abafuula bameeri babe.
33 Ehiŋwabo hya Musengwa hiri hu mago gʼababi
aye aŋa ekabi amago gʼabagwalaafu.
34 Anyooma abepaahapaaha
aye aŋambira abo abeŋomeha ehisasabirisi.
35 Abagesi babaŋa eŋono
aye abaŋubeebe baliswala.