2
Ebiraŋi ebi magesi galeeta
1 Mwana wase singa ofugiirira ebibono ebi ndoma
era waŋamba ebiragiro byange,
2 waŋulira ebibono ebyʼamagesi
era waŋayo omwoyo ohubitegeera
3 era onayayanira ohumanya
wegayirira ohuhuŋa ohutegeera
4 era wendula amagesi hyʼowendula efeeza
hyʼowendula ebyʼobuŋinda ebi bahweha,
5 aŋo oja humanya ohutya Musengwa ehi hitegeesa
era oja hutegeera Hatonda.
6 Hiri hiityo olwohuba Musengwa njʼaŋa amagesi
era ebibono bibye bireeta ohumanya nʼohutegeera.
7 Ayeeda era ahuuma abagwalaafu
era njʼengabo yaabo abesigwa.
8 Agadirira abo abatehubbira
era ahuuma abesigwa.
9 Nʼoja huŋayo omwoyo gugwo hu ebi kulabbira,
oja humanya ebituufu ebyʼamazima era ebi osaana ohuhola.
10 Oja hufuuha mugesi
era ohumanya huja huhufuula musangaafu.
11 Ohumanya huja huhuhuumanga
era obutegeefu buja huhugadiriranga.
12 Amagesi gaja huhuŋonia amagira gʼabahosi bʼebibi,
gaja huhuŋonia abaatu abagodama,
13 abo abaleha ohugendera mu ngira enduŋamu
nga bagendera mu hiirema.
14 Abanyumirwa ohuhola ebibi
era basangaalira obugodami,
15 amagira gaawe magodami
era ebi bahola sibiraŋi.
16 Amagesi gaja huhuŋonia omuhasi omuhwedi,
gahutaase nʼebibono bibye ebihusendasenda.
17 Owalehaŋo wamwe owomu buvubuka wuwe,
gabbwaga endagaano eyi gaahola mu moni ja Hatonda.
18 Ohwingira mu nyumba yiye huba hutiina mu hufa
era nʼengira eyitiinayo yija yimagombe.
19 Hiisi atiina eyi ali,
aba aŋambire engira eyʼohusihiiriha.
20 Olwʼehyo oja hugenderanga mu ngira eyʼabaatu abagwalaafu
era ogumirenga hu magira aga bagwalaafu,
21 olwohuba abagwalaafu njʼabaja ohumenya hu hyalo
era abaŋumaho mbalo njʼabalihisigalamo.
22 Aye Hatonda aja hutusa abahosi bʼebibi hu hyalo
era asihirise abatali besigwa.