Ehitabo hyʼ
Engero
Enyanjula
Ehitabo hyʼEngero hyehumbanihisyamo ebibono ebyʼamagesi. Ŋaaliŋo abaŋandiisi abandi abaŋandiiha ehitabo hino aye Habaha Sulemaani omusaani wa Habaha Dawudi njʼowaŋandiiha engero ejihira obungi. Sulemaani gaali amanyiheene olwʼamagesi gage era mu hitabo hyʼAbahabaha Ehidaayi 4:32 hiroma hiiti Sulemaani gaŋandiiha Engero ekumi edatu. Ehitabo hyʼEngero ehihira obubbala bahiŋandiiha mu hiseera ehi Sulemaani gabereyemo habaha. Engero ejindi bajiŋandiiha mu hiseera ehi habaha Hezekiya gaŋugiyemo Buyudaaya.
Engero bibono byʼamagesi ebituufu aye jenjabulo hu bisuubise oba obunaabbi. Ehyohuboneraho, Engero 22:6 luloma luuti, “Tendehanga omwana nʼahiiri muŋere ngʼolu ali nʼohwebisya nʼaja huhula, saaja huŋwa hu ebi wamusomesa.” Ne olunyiriri luno sirusuubisa luuti hiisi mwana aja hugoberera ebi basaaye babe bamusomesa aye luŋa amagesi amalaŋi agʼohutiiniraho. Ehitabo hyʼEngero hiroma hu mugaso gwʼEngero mu suula 1:2-6. Engero jiyeeda ohugunjula abaatu abaŋuma ehi bamanyire nʼabahiiri abaŋere ohuba nʼamagesi nʼohubalabbira obulaŋi. Era Engero jifuula abaatu abagesi beyongera ohuba bagesi bugali.
1
Emigaso jʼengero
1 Jino jʼengero ja Sulemaani omusaani wa Dawudi era habaha wa Yisirayiri.
2 Emigaso jʼengero jino,
hulabbira omuutu ohusuna amagesi nʼesambo endaŋi
ko nʼohutegeera ebibono ebyʼamahulu.
3 Jisomesa omuutu ohuba nʼesambo endaŋi
nʼohuba mwesigwa nʼatehubbira era omudimamu.
4 Engero jiigula emoni jʼabo abatamanyire bingi
jʼabaleetera ohutegeera
era jiŋa abavubuka amagesi mu husalaŋo ehyʼohuhola.
5 Leha omugesi aŋulirise
geeyongere ohubeera erala mugesi
era leha omutegeefu asune ohumanya,
6 ohutegeera amahulu gʼengero
nʼendoma eyʼohubbumbirya
ko nomu bibono nʼebikoyiko ebyʼabaatu abagesi.
7 Ohutya Musengwa njʼetandiha yʼohumanya.
Ne abaŋubeebe banyooma amagesi
era sibenda hwega.
8 Mwana wase, ŋuliirisa ebi lataawo ahulaabbira
era solehanga ebi maawo ahusomesa.
9 Ebi wasoma bija huba hyʼengule eyʼeŋono hu mutwe gugwo
era hyʼomudaali ogwʼeŋono mwigosi.
10 Mwana wase, singa abahosi bʼebibi bahuhongeresa ohuhola ehibi,
otafugiirira huhihola.
11 Singa bahuloma baati,
“Nja otweŋimbeho, huje hweteege hwite omuutu hwesangaase,
wayire atuŋumaho songa yosiyosi,
12 leha hubalye balamu hubamire,
ngʼolu amagombe gamira abaatu.
13 Huja hunyaga ebiitu ebyʼomuŋendo ebya hiisi ngeri
era hwijuse amayumba geefe nʼebyomunyago.
14 Nja otwegaateho,
huja hugabana ebi hwiba.”
15 Mwana wase otahola muhumba ni nabo
era otaholanga ebi bahola,
16 olwohuba baŋemberesa ohuhola ebibi
era bangu ohutemula abahyawe.
17 Nga hiŋuma mugaso ohutega oluhumbeeri
enyuni eji wenda ohuŋamba ni jibona!
18 Ebi baatu abo bahola bibalondoola abeene
era nawoogi wʼefumo siwutya awuŋagaaye.
19 Baatyo pobaliba abo abasuna obuŋinda mu kola embi,
baheneresa ni bafiriiye obulamu waawe.
Amagesi galanga
20 Amagesi galanga nʼejanjaasi eryʼamaani mu nabiŋwera
galanga nʼamaani mu bifo ebyʼolukale,
21 galangirira nʼejanjaasi eryʼamaani mu akisoni
nohu mulyango gwʼehibuga gaati,
22 “Enywe abaŋuma ehi mumanyire,
mulyosa ŋe ohwenda ohuba mu hutategeera?
Enywe abanyoomi mulyosa ŋe ohunyumirwa obunyoomi wenywe?
Era abaŋubeebe enywe mulyosa ŋe ohucaawa ohumanya?
23 Ŋuliirisa nimba ni kuleegera, nja huhuŋa amagesi amalaŋi
kuŋe nʼebiŋeego byange.
24 Ne ngʼolu wanegaana ni nahulanga
era siwafayo ni nahusimirya,
25 ngʼolu wanyooma amagesi aga nahuŋa
era siwebbwaga ni nahunenya,
26 keesi ndi hujeherera nʼoli mu bugosi
ndi hulengerera hulengerera ebigwa ni bitalagire ni bihuguyeho,
27 ebigosi ni biri huujira hyʼomuyaga ni biri hweswanigirisa hya hafuusa,
olu ebigwa ni bitalagire birihunyigirisa byahuŋinga.
28 “Balindanga ne sindibagobolamo
balinyendula aye sibalimbona.
29 Ngʼolu bacaawa ohumanya
era ndibatoboleŋo ohutya Musengwa.
30 Ngʼolu bagaana amagesi gange
era banyooma ohubanenya,
31 baja hulya hu bibala byʼebikolwa byawe
era balyesinya ebibala ebiŋwa mu bujeemu waawe.
32 Ehiita abaŋubeebe, hugaana magesi
era ehibeeta hutafaayo.
33 Aye hiisi aŋuliirisa ebi ndoma anaabenga nʼemiyaaya
era nʼeŋuma ehi atya nʼehimusindusa.”