Ehitabo hyʼEzabbuli hirimo enyembo ko nʼesaala. Mu Lubbebbulaniya ehibono Zabbuli, hitegeesa olwembo olwʼohujumirya Hatonda. Ezabbuli ejihira obungi mu butuufu oweene nyembo ejʼohujumirya Hatonda aye ŋaliŋo Ezabbuli ejʼengeri eyindi. Ejindi ejo saala ejisunga Hatonda obuyeedi nʼejindi hweririgana ohulaga enaku eyʼamaani. Mulimo Ezabbuli ejipaaha habaha wa Yisirayiri nʼejindi jisomesa abaatu ebiitu ebiŋamba hu huba nʼamagesi nʼebi Hatonda genda era ko nʼebiitu ebindi.

Abaatu bangi abaŋandiha ebiri mu hitabo hyʼEzabbuli era bahena emyaha emyene emingi ni babihumbaania. Ezabbuli ejindi kayire enyene era bajiŋandiiha mu hiseera ehi Dawudi gaberamo habaha. Mu butuufu Dawudi gaŋandiiha Ezabbuli nyingi. Ejindi bajiŋandiiha oluvanyuma lwʼAbayudaaya ohwagamayo mu gwanga lyawe ohuŋwa mu buŋaŋanguse e Bbabbulooni.

Abaŋandiiha Ezabbuli, bajiŋandiihanga olunyiriri oludaayi ni lwanjula olwohubiri. Aŋandi olwohubiri ni luhahasa ebi ludaayi lulomaho oba ni lwejulirisa oba ni luloma ehiitu ehyene hyʼehiri mu lunyiriri oludaayi ne ni batambisa ebibono ebindi. Epandiiha eyo ya Hibbebbulaniya, mu kola eyʼohubbubbirya nʼohunyoŋinya hubi baba ni balomaho. Era cʼehigira epandiha yʼEzabbuli yʼenjabulo hu pandiha yʼebitabo hyʼEtandiha ni Samwiri ni Yoswa.

Ezabbuli njʼehirala hu bitabo ebi baatu bamanyire bugali mu Bbayibbuli. Ezabbuli nyingi eji batambisanga mu hujumirya Hatonda mu Yekaalu e Yerusaalemu. Ezabbuli jitwigirisa engeri eyʼohulombamo nʼohujumirya Hatonda Owaŋamugulu Obugali. Ezabbuli eya 23 ereeteye bangi abali mu butahi ohuguma. Eya 51 yireeteye bangi ohwenenya ebibi byawe bagobola eyiri Hatonda. Eye 110 yireetera abaatu ohugobolamo amaani era baba nʼesuubi olwohuloma hu Munoŋosi aja huba habaha era omusengi wa Hatonda mu moni eyo.