2
1 Lwahiina amawanga gahuluŋira ohwaga aŋo
era abaatu bagesyaho ohuhusalira oluhwe oluŋumamo.
2 Abahabaha hu hyalo bahwesoomera,
nʼabaŋugi bahumbaana ŋalala ohusoosa Musengwa
ni nooyo oyu bajuhaho amafuta ni baloma baati,
3 “Muhole hukapule enjegere jaawe
era hwetuseho nʼepingu jaawe.”
4 Oyo owihaaye mwigulu hu tebe eyʼobuŋugi abajeherera,
Musengwa atala etegeha jaawe.
5 Era abahayula nʼobusungu,
gabahanga nʼehiruŋi ati,
6 “Natongosa habaha wange
hu lusozi lwange Sayuuni olwawufu.”
7 Habaha aloma ati,
“Nja hulangirira ehiragiro hya Musengwa ehi gandoma ati,
‘Oli mwana wange, olwa leero kusaaye.
8 Sunge era nja huhuŋa amawanga gosigosi ohuba obusika wuwo,
ehyalo hyosihyosi hibe ŋaasi wʼobuŋangi wuwo.
9 Olibaŋuga nʼesimbo eyʼehyoma
era olibatetenula hyʼatetenula esongo.’ ”
10 Olwʼehyo bahabaha enywe mugobolemo amagesi,
enywe abaŋugi bʼehyalo mwege bino.
11 Muŋeeresenga Musengwa nʼohutya.
Era musaŋalyenga nʼohutetema.
12 Hubbira Omusaani amafuha
ko obusungu butamuŋamba gabaluŋira
era hyabaŋweramo ohusihiiriha.
Besiimire abo bosibosi abenda Musengwa abayeede.