102
Esaala yʼomuutu ali mu bugosi.
1 O Musengwa, ŋulira ohusaba hwange,
leha ohwerira hwange hwole eyi oli.
2 Otakubba mugongo ni ndi mu bigosi.
Tegere ohutwi, ni kulanga ngobolemo mangumangu.
3 Hiri hiityo olwohuba obulamu wange
buli hudumuuha hyʼeriisi erya haseera buseera,
nʼamagumba gange gahumulya huhumulya.
4 Ndi huŋotoha huŋotoha hyʼenyaasi
nebirira nʼohulya emere.
5 Olwʼohubinda ohumbindamo ohutahoma
sigaaye magumba mereere.
6 Ndi hya woogu owomu lulafu,
hya woogu ali eyo yeŋene mwigunda.
7 Sinimba hwiro,
ndi hyʼenyuni eyiri yoŋene hu hisuli hyʼenyumba.
8 Abalabe bange basiiba banduha
era esiina lyange lyafuuha duho.
9 Era egohe njʼemere yange,
amasiga njʼamaaji aga nywa,
10 olwʼehiruŋi hihyo ehyʼamaani,
wapamba wandanya ebulafu.
11 Obulamu wange buli hyʼehisisigo
era buŋotoha hyʼenyaasi.
12 Aye ewe Musengwa, wihaaye hu tebe eyʼobuŋugi emirembe nʼemirembe,
era hiisi mulembe guja huhuhebuliranga.
13 Oja huŋambira Sayuuni ehisa, olwohuba njʼehiseera ohuŋambira abaatu baamo ehisa.
Ehiseera ehiragaane hyolire.
14 Abaŋeeresa babo benda ehibuga Sayuuni bugali
era hibaluma bugali ohubona ni higuuye.
15 Amawanga gosigosi gaja hutya Musengwa
abahabaha bosibosi balihuŋa eŋono.
16 Musengwa aja hutongola Sayuuni bunyaaha,
aja hulaga amaani gage.
17 Aja hwanuhula esaala jʼabagadi,
saaja hunyooma hwerira hwawe.
18 Leha hino bahiŋandiihire abʼomulembe oguuja,
abaatu abahiiri husaaliwa bahajumirya Musengwa,
19 baati, “Musengwa nʼali mu hifo hihye ehyawufu,
nʼali mwigulu gaaheja ŋaasi hu hyalo,
20 ohuŋulira ohubinda hwʼabasibe,
anunule abo ababasalira ogwʼohufa.”
21 Olwʼehyo efuma ya Musengwa baja huyiŋayangaho mu Sayuuni,
etendo lirye baja huliŋayangaho mu Yerusaalemu,
22 olu baatu nʼabahabaha
banahumbaanenga ohujumirya Musengwa.
23 Nahali kiiri nʼamaani aye Musengwa gandeteeye ohuŋuma maani ni kiiri muvubuka,
obulamu wange abusalireeho.
24 Nga ndoma ti, “Ewe Hatonda wange,
otatusaŋo ni kiiri husahuluŋa, ndiiwe aliŋo emirembe josijosi.
25 Mu hutagiha watonda ehyalo
era nʼegulu ndiiwe owalihola.
26 Egulu nʼehyalo biriŋwaŋo aye ewe olibaaŋo emirembe nʼemirembe.
Byosibyosi birihayiriŋa hyʼolugoye.
Birihayiriŋa hyʼolugoye byaŋwaŋo.
27 Aye ewe osigala cʼehyene
era olibaaŋo emirembe nʼemirembe.
28 Abaana ba baŋeeresa babo baja huba ni neewe
era olulyo lwawe luja huba bulaŋi.”