104
1 Omwoyo gwange gweyaase Musengwa
O Musengwa Hatonda wange,
oli wʼamaani bugali, wetwihire eŋono nʼobubbala.
2 Wewihirira enjase hyʼehyambalo
era wanjulusa egulu hyʼeweema.
3 Watongola amago gago ŋamugulu wʼamaaji
era otambisa ebireri hyʼehigaali,
wagendera hu mabaŋa gʼembeŋo.
4 Afuula abahwenda babe ohuba hyʼembeŋo,
nʼabaŋeeresa babe ohuba hyʼendimi jʼomuliro.
5 Waata ehyalo hu musingi omugumu
era ŋaŋuma aŋanga ohuhitengesya.
6 Enyanja yawiiha hu hyalo hyʼomuutu owetaho ehyambalo
era amaaji gawiiha esozi.
7 Aye ni wahayula amaaji, gaŋulira ejanjaasi liryo
era ni lyawatuha, gaduluma.
8 Gahuluhutira hu sozi nga gaserengetera mu biinamo
mu hifo ehi wataŋo ti pomu gali nʼohwehumbanihisya.
9 Waataŋo olwaha ohwabula ehyalo nʼamaaji
era sigaja hwambuha hubanda hu hyalo nindi.
10 Oleetera esulo jʼamaaji ohuhuluhutira mu biinamo,
nʼenjabi ohuhuluhutira mu sozi.
11 Jiŋa esolo josijosi amaaji,
nasugirya ejomwisugu jinywa jaŋona enduŋo.
12 Enyuni jitongola ebiswi byajo hu maaji,
jembera mu masaga gʼemisaala.
13 Atonyesa efula hu sozi ni yiŋwa mwigulu,
ngʼehyalo hyejula ebibala bibye.
14 Amerusa enyaasi hu hyalo ebyayo ohwaya,
omuutu ohulima ebimera bireeta emere ohuŋwa mwiroba.
15 Era bahungula omwenge ogwʼemizabbibbu gwabaleetera esangaalo,
nʼamafuta agahaloosa aganyerengesa oweeni waawe,
nʼemere ebaŋa amaani.
16 Efula ejuhirira emisaala ja Musengwa,
emitumba ohuŋwa mu Lebbanooni eji gahoma.
17 Mu misaala ejo, enyuni jitongolamo ebitala
nga jalutu gesunira amago.
18 Esolo ejomwisugu ejifaana oti embusi jimenya hu sozi endeeŋi,
obusolo obutono bumenya mu pungulu.
19 Wataŋo omwesi ohwabula ebiro,
eryuba limanyire esaawa eyohugwa mu maaji.
20 Wataŋo ehiirema ngʼohiranga wiire,
ngʼesolo ejomwisugu jiŋwayo ohwendula emere.
21 Epologoma epere jeŋunduguma,
ni jiŋiima ehi Hatonda anajiŋe ohulya.
22 Eryuba ni liŋwayo nga jagamayo,
jiŋenyuha mu pungulu jaajo.
23 Ngʼaŋo abaatu batiina mu ndimiro jaawe,
batamba ohwola ehyegulo.
24 O Musengwa, nga waahola ebiitu bingi bugali!
Ehyalo hyejuuye bitonde bibyo.
25 Agayanja nʼobugalamu waago,
gejuuye bitonde bibyo ebitabaliha,
ebiramu ebitono nʼebibbala.
26 Emeeri jigenderaho eyi ni neeyi,
ehinyaŋa ehi watonda higuduliramo.
27 Ebitonde byosibyosi bihuumirira
ndiiwe ohubiŋa emere mu biseera.
28 Nʼobiŋa emere, nga bijibunga
era onaganjuula omuhono gugwo nga byeguta.
29 Onaheja eruuyi, byeraliihirira,
nʼobitusamo omuuya, nga bifa,
bifa nga byagama mwifuuhe omu byaŋwa.
30 Nʼobitamo omuuya nga bifuuha biramu,
ngʼehyalo ohigobosa bunyaaha.
31 Leha Musengwa geyongere ohuba wʼeŋono emirembe nʼemirembe,
era leha Musengwa asangaale olwʼebiitu ebi gatonda.
32 Oyo aheja huheja hu hyalo, hyateetema
era aŋamba hu sozi jaduunya eriisi.
33 Nja hwemberanga Musengwa mu bulamu wange wosiwosi.
Nja hwemba ni jumirya Hatonda ni kiiri mulamu.
34 Leha epeega yange emusangaasenga,
olwohuba esangaalo lyange liŋwa yiwa Musengwa.
35 Aye leha abahola ebibi basihiirihe baŋwe mu hyalo
era abahosi bʼebibi baŋwereŋo erala.
Omwoyo gwange gweyaase Musengwa.
Mujumirye Musengwa.