105
1 Mweyaase Musengwa, mumujumirye,
mulomere abaatu ebi ahola.
2 Mumwembere,
mumwembere ni mumujumirya,
mulome hu byeŋunjisa byosibyosi ebi aholire.
3 Mwejage hu lwʼowawufu wuwe,
leha abaatu abo abali nʼemyoyo ejendula Musengwa basangaale.
4 Mwendulenga Musengwa nʼamaani gage
era mumujumiryenga hiisi hiseera.
5 Muhebulire ebyeŋunjisa ebi gaahola,
ebyamaliholiho nʼekola eyi gasalamo emisango,
6 enywe olulyo lwa Yibbulayimu omuŋeeresa wuwe,
abejuhulu ba Yakobbo aba gatobola.
7 Nje Musengwa Hatonda weefe,
asala emisango hu hyalo hyosihyosi nʼatehubbira.
8 Ahebulira endagaano yiye emirembe nʼemirembe,
ebi gasuubisa emirembe olukumi,
9 endagaano eyi gahola ni Yibbulayimu
nʼehi gasuubisa Yisaka nʼamulayirira.
10 Gayinywanywasa eyiri Yakobbo,
eyiri abaatu Bayisirayiri ngʼendagaano eyʼemirembe nʼemirembe.
11 Galoma ati, “Ndibaŋa ehyalo hyʼe Kanani
ohuba omuŋuluko gwenywe.”
12 Ni baali ni bahiiri batono, ni bali badiidiri,
era ni bali bawuli mu hyalo ehyo,
13 batiina ŋano ni naŋala mu mawanga,
ohuŋwa mu wahabaha buno ni nobula.
14 Sigaleha muutu yesiyesi hubanyigirisa
era bagima gahayula abahabaha.
15 Nʼaloma ati, “Mutaŋamba hu baatu bange,
aba najuhaho amafuta, simukosanga banaabbi bange.”
16 Gaŋindiha enjala hu hyalo ehyo,
ngʼemere yaawe yosiyosi yiŋwaŋo.
17 Gatuma omuutu ohubatangiriramo,
Yosefu oyu batunda hyʼomwidu.
18 Balumya amagulu gage ni bamusidiha nʼenjegere,
bamusidiha ehyoma mu mamiro,
19 ohwola olu ebyo ebi galomaho byolerera.
Ehibono hya Musengwa hyahahasa ti gaali mutuufu.
20 Habaha wʼe Misiri gatumisa nga bamusitula,
omuŋugi gamulehula.
21 Gamuŋa obuhulu hu baatu babe,
gamuŋambya ohulabirira ebibye byosibyosi,
22 alaabbire abahungu babe ngʼolu gaali ni genda
era aŋenga abasaaja bahulu amagesi.
23 Ngʼaŋo Yisirayiri atiina e Misiri,
nga Yakobbo gesenga mu hyalo hyʼe Haamu.
24 Musengwa galeetera abaatu babe ohusaala bugali,
gabaŋa amaani ohusinga abalabe baawe.
25 Galeetera emyoyo jʼAbamisiri ohucaawa abaatu babe,
ohulya mu baŋeeresa babe oluhwe.
26 Ngʼatuma Musa omuŋeeresa wuwe,
ni Alooni abaatu abagatobola.
27 Baahola obubonero wuwe oweŋunjisa mu Bamisiri,
ebyamaliholiho bibye mu hyalo hyʼe Haamu.
28 Musengwa gaŋindiha ehiirema ngʼaleetera ehyalo ohumaliŋa
aye Abamisiri bajeema ohuŋuliririsa ebibono bibye.
29 Gafuula amaaji gaawe ohuba mafugi,
hyaleetera enyeeni jaawe ohufa.
30 Ehyalo hyawe hyejula amahere,
agejula nomu bisenge bya baŋugi baawe.
31 Musengwa ni gaŋa ehiragiro
esoŋera nʼobugujwi byamalaala egwanga lyawe lyosiryosi.
32 Gafuula efula yaba mabaale,
nʼohumyasa hwaba mu hyalo hyawe.
33 Gasihiirisa emizabbibbu nʼemitiini jaawe,
gabbwagabbwaga emisaala josijosi mu gwanga lyawe.
34 Galoma huloma ngʼesige jiija,
amadeede agatabaliha.
35 Galya hiisi himera hyosihyosi mu gwanga lyawe,
nga galya emere yaawe yosiyosi.
36 Ngʼasihiirisa abasaani baawe abadaayi bosibosi mu gwanga lyawe,
abo ababeeta amaseere.
37 Ngʼotusaayo Abayisirayiri ni babbeedire efeeza nʼezaabbu,
era ŋaŋuma hu baatu babe owasigala enyuma.
38 Abamisiri basangaala abaatu abo ni baŋwa mu gwanga lyawe,
olwohuba Abayisirayiri baali babaleteye olusisimo.
39 Musengwa ganjulusa ehireri ohubawiiha,
nʼomuliro ohubaŋa enjase mu wiire.
40 Ni bamusunga gabaŋa esindu
era ngʼabaŋa emigaati ohuŋwa mwigulu.
41 Gegulaŋo ebaale ngʼamaaji gajofumuha
gahuluhuta mu lulafu hyʼolwabi.
42 Gahebulira ehisuubiso hihye ehyawufu
ehi gaaŋa Yibbulayimu omuŋeeresa wuwe.
43 Gatusayo abaatu babe ni bemba nʼesangaalo,
ababe abagatobola.
44 Gabaŋa ehyalo hya mawanga,
basikira ebyo ebi bandi bafululuhanira,
45 basobole ohuŋambanga ebiragiro bibye,
era bahuumenga amagambi gage.
Mujumirye Musengwa.