106
1 Mujumirye Musengwa.
Mweyaase Musengwa olwohuba mulaŋi
era ohwenda huhwe hwʼemirembe nʼemirembe.
2 Njʼani asobola ohuloma hu byosibyosi ebi Musengwa ahola,
oba gamujumirya ehihena?
3 Besiimire abo abatehubbira,
abahola ebiruŋamu hiisi hiseera.
4 Musengwa kebulirenga nʼoyeeda abaatu babo,
keesi mbe mu abo aba onunula,
5 nahasunaaho omugabo ogwa baatu babo,
nahasangaalira ŋalala nʼegwanga liryo,
keesi mbegaateho ni bahujumirya.
6 Efe hwabbenga hyʼabasehulu beefe,
hwahola ebibi era hwebisya mu ngeri etasaana.
7 Abasehulu beefe ni baali e Misiri
sibategeera ebyamaliholiho bibyo,
sibahebulira hwenda huhwo eyi bali
era nga bajeema ni boola hu nyanja, Enyanja Enando.
8 Aye gabanoŋola hu lwʼesiina lirye
ni genda ohulaga obuŋangi wuwe owʼamaani.
9 Galagira Enyanja Enando yomeera
ngʼab atangirira oti hani hu woomu, hyʼababita mu lulafu.
10 Gabanoŋola ohuŋwa mu buŋangi wʼabo abaali ni baabacaawa,
gabanunula ohuŋwa mu balabe.
11 Amaaji gamira abalabe baawe,
ŋaŋuma wayire mulala owaŋona.
12 Ngʼaŋo bafugiirira ebi gaali nʼabasuubihiise,
nga bemba ni bamujumirya.
13 Aye sibalwa hwibirira ebi gaahola,
era sibahuuma hubona ehi Hatonda gaali nʼategehire ohuhola.
14 Ni baali mu lulafu baholanga ebi baŋembangaho,
era mu lulafu baahema Hatonda.
15 Kale gabaŋa ebi bamusunga,
aye gabataho endwaye eyʼehiŋindo.
16 Ni baali mu kambi, esaalwa yabaŋamba olwa Musa
ni Alooni oyu Musengwa gafuula mwawufu.
17 Eroba lyasama lyamira Dasani,
lyawiiha hu Abbiraamu nʼabajeemu bahye.
18 Omuliro gwiha mu baloobera baawe
gwasihiirisa abahosi bʼebibi.
19 Ni baali e Horebbu basanuusa ezaabbu,
babbotamo enyana yʼeŋombe, nga bayijumirya.
20 Mu hifo hyʼohuŋa Hatonda eŋono,
baaliŋa nyana yʼeŋombe eyaaya enyaasi.
21 Beebirira Hatonda owabanunula,
owaali nʼaholire ebyamaliholiho e Misiri,
22 ebyamaliholiho mu hyalo hyʼe Haamu,
ebitiisa hu Enyanja Enando.
23 Ngʼaŋo aloma ati aja hubasihiirisa
ne Musa omutobole wuwe
gegayirira Hatonda ohutabasihiirisa olwʼehiruŋi hihye.
24 Nga bajerega ehyalo ehisangaasa,
sibafugiirira mu ehi gabasuubisa.
25 Ni baali mu weema jaawe bemulugunya,
era sibagondera Musengwa.
26 Olwʼehyo, gaberayirira ati baja hufiira mu lulafu,
27 aja huleetera abejuhulu baawe
ohusasaanira mu mawanga.
28 Abaatu ba Hatonda ni boola e Pewori, boosi batandiiha ohujumirya Bbaali
era balya ebi baŋongeranga abahatonda abaŋuma bulamu.
29 Baleetera Musengwa ohuluŋa olwʼebikolwa byawe ebibi,
ngʼaŋo haŋupuli abagwamo.
30 Ne Fenekaasi gaŋwayo gaboneresa abo ababbenga,
ngʼaŋo haŋupuli ahoma aŋo.
31 Ehyo hyamuleetera ohumubala
ohuba omugwalaafu emirembe nʼemirembe.
32 Hu sobere jʼe Meribba, baleetera Musengwa ohubaluŋira,
nga baleetera Musa ebigosi ebyʼamaani,
33 olwohuba baleetera Musa ohuluŋa,
era ngʼaloma atyo atyo.
34 Sibasihiirisa baatu abamawanga agandi ago
ngʼolu Musengwa gabalagira,
35 aye bamenya ŋalala nʼamawanga ago,
era nga baŋamba esambo jaawe embi.
36 Bajumirya ebibbote byawe,
ebyabafuuhira omutego.
37 Baŋongayo abaana baawe,
abaseere nʼabahaana eyiri emisambwa.
38 Bajuha amafugi gʼabaatu abaali ni baŋumaho musango,
batugumbula abaana baawe abaseere nʼabahaana
aba baŋongayo eyiri ebibbote byʼe Kanani.
Ehyo hyaleetera ehyalo ohubiiŋa.
39 Beyonoona olwʼebikolwa byawe, olwʼebi baahola ni bajumirya ebibbote,
waali buhwedi mu moni ja Hatonda.
40 Olwʼehyo, Musengwa
galuŋira abaatu babe era gabesinya.
41 Gabaŋayo mu buŋangi wʼamawanga agandi
era nga abalabe baawe babaŋuga.
42 Abalabe baawe babanyigirisa
era babaŋugira erala nʼamaani.
43 Emirundi mingi gabanunulanga aye baali bajeemu
era bagoteranga mu bibi byawe.
44 Ne gabona ohubonaabona hwawe
era nga aŋulira ohulira hwawe.
45 Hu lwawe gahebulira endagaano yiye,
era olwʼohwenda huhwe ohwʼamaani,
gabasoniŋa nasabahangavula.
46 Galeetera abaali ni babanyigirisa
ohubaŋambira ehisa.
47 Tunoŋole Musengwa Hatonda weefe,
otuhumbaanie ohuŋwa mu mawanga
hwahahweyaasanga ewe omwawufu,
hwahejaganga mu huhujumirya.
48 Aŋeewe eŋono Musengwa Hatonda wa Yisirayiri emirembe nʼemirembe.
Leha abaatu bosibosi balome baati, “Amiina.”
Mujumirye Musengwa.