111
1 Mujumirye Musengwa.
Nja hweyaasa Musengwa nʼomwoyo gwange gwosigwosi
mu luhumbaano lwʼabagwalaafu nomu lwijuuye lwʼabaatu.
2 Musengwa ahola ebyʼamaani,
abo bosibosi ababisangaalira babiŋeegaho.
3 Ebi ahola byosibyosi biraga eŋono nʼobuŋangi wuwe
era mulaŋi emirembe nʼemirembe.
4 Musengwa satuleha hwibirira byamaliholiho bibye,
ali nʼehyere era nʼehisa.
5 Abamutya abaŋa ebyohulya,
era ahebulira endagaano yiye emirembe nʼemirembe.
6 Alagire abaatu babe obuŋangi mu ebi ahola,
nʼabaŋa ehyalo hyʼamawanga agandi.
7 Mwesigwa era sigehubbira mu byosibyosi ebi ahola,
ebiragiro bibye byesigiha.
8 Sibicuuhacuuha emirembe nʼemirembe,
gabitaŋo mu butuufu nʼamazima.
9 Ganunula abaatu babe gahola endagaano yiye,
endagaano enjawufu, eyʼemirembe nʼemirembe.
Esiina lirye lyawufu era lyʼeŋono.
10 Ohutya Musengwa njʼetandiha yʼamagesi.
Bosibosi abahola ebi alagira, bali nʼobutegeefu.
Abaatu basaana bamujumiryenga emirembe nʼemirembe.