116
1 Nenda Musengwa olwohuba aŋulira ejanjaasi lyange,
gaŋulira ni namweriririra ohupambira ehisa.
2 Era olwohuba gategera ohutwi,
nja humulombanga mu bulamu wange wosiwosi.
3 Ohufa hwandumba
obulumi owʼemagombe wanjijira,
ebigosi nʼobutahi byakenamo amaani.
4 Ngʼaŋo neŋunderera Musengwa ti,
“O Musengwa ponie!”
5 Musengwa ali nʼehisa era mulaŋi,
Hatonda weefe gejuuye ohusaasira.
6 Musengwa ahuuma abaŋuma buyeedi,
gaaponia ni naali mu bigosi.
7 Omwoyo gwange gwihahene,
olwohuba Musengwa mulaŋi eyi oli.
8 O Musengwa, onunuuye obulamu wange ohuŋwa mu hufa,
emoni jange ohuŋwa mu masiga,
amagulu gange ohutaterera,
9 ko ngendenga mu moni ja Musengwa
mu hyalo hyʼabalamu.
10 Nafugiirira olwʼehyo naloma ti,
“Mbweneweene luhulu lwene!”
11 Era olwʼobulumi obu nalimo naloma ti,
“Abaatu bosibosi badulingi!”
12 Hiina ehi panga ohusasula Musengwa,
olwʼebiraŋi byosibyosi ebi gakoleeye?
13 Nja huŋira omwenge ogwomu mizabbibbu
peyo eŋongo ohweyaasa Musengwa olwʼohunoŋola.
14 Nja hwoheresa ebi neeyama mu moni ja Musengwa
mu lwijuuye lwʼabaatu babo.
15 Ohufa hwʼomuutu omugwalaafu
hwamuŋendo bugali mu moni ja Musengwa.
16 O Musengwa, mu butuufu weene ndi muŋeeresa wuwo,
ndi muŋeeresa wuwo era omusaani wʼomuhasi omwidu wuwo,
wuponisye ohuŋwa mu njegere.
17 Nja huhuŋa eŋongo ni kweyaasa
era Musengwa nja huhweŋunderera.
18 Nja hwoheresa ebi neeyama mu moni ja Musengwa,
mu lwijuuye lwʼabaatu babo,
19 mu lunya lwʼe nyumba ya Musengwa,
mu Yerusaalemu.
Mujumirye Musengwa.