115
1 Sindiife, Musengwa, sindiife
aye ewe oŋeewe eŋono,
olwʼohwenda ohubitiirifu nʼowesigwa wuwo.
2 Lwahiina amawanga gebuusa gaati,
“Hatonda waawe ali ŋeena?”
3 Hatonda weefe ali mwigulu,
era ahola hiisi ehimusangaasa.
4 Aye ebi bajumirya biwumbe ebi bahola mu feeza nʼezaabbu,
era abaatu njʼababibbota nʼemihono jaawe.
5 Biri nʼeminwa aye sibiroma,
biri nʼemoni aye sibibona.
6 Biri nʼamatwi aye sibiŋulira,
biri nʼesuulu aye sibiŋunyira.
7 Biri nʼengalo aye sibiŋamba,
biri nʼamagulu aye sibigenda
nʼohutusa ejanjaasi sibitusa.
8 Ababiwumba balifaanana hya nibyo,
hiityo pohiri nʼeyiri abo bosibosi ababitamo owesige.
9 Ne enywe enyumba ya Yisirayiri,
mwesige Musengwa,
njʼomuyeedi era njʼengabo yenywe.
10 Enywe abomu nyumba ya Alooni,
mwesige Musengwa
njʼomuyeedi era njʼengabo yenywe.
11 Enywe abatya Musengwa mumwesige,
njʼomuyeedi era njʼengabo yenywe.
12 Musengwa atuhebulira era aja hutuŋa ekabi.
Aja huŋa Abayisirayiri ekabi
era aja huŋa abomu nyumba ya Alooni ekabi.
13 Musengwa aja huŋa hiisi muutu amutya ekabi,
haabe mwegingihiriri oba wa ŋaasi.
14 Musengwa geyongere ohuhwasa,
ewe nʼabaana babo.
15 Musengwa abaŋe ekabi,
owatonda egulu nʼehyalo.
16 Egulu eryaŋamugulu eweene lya Musengwa
aye ehyalo gaahiŋa abaatu.
17 Abafu sibajumirya Musengwa
abo abatiina emagombe eyi baba ni baŋoleeye.
18 Aye efe abalamu ndiife abajumirya Musengwa,
ohuŋwa hatyane ohwola emirembe nʼemirembe.
Musengwa gebasiwe.