132
Olwembo nʼotiina e Yerusaalemu.
1 O Musengwa, hebulira Dawudi
nʼebigosi byosibyosi ebi gagumira.
2 Galayirira Musengwa
geyama mu moni jʼOmwene Buŋangi owa Yakobbo ati,
3 “Sinja hwingira mu nyumba yange
oba huniina hu hitanda hyange
4 oba huŋenyuha hu hwiro
wayire huŋongera
5 ohwola olu ndifunira Musengwa
ehifo aŋa Omwene Buŋangi owa Yakobbo anamenyenga.”
6 Hwaŋulira hu biŋamba hu Sanduuku yʼEndagaano mu Efulaasi
era hwayibona e Jaari.
7 Ngʼaŋo huloma huuti, “Hutiine hwingire omu Musengwa amenya,
humujumirihisye ŋa tebe yiye eyʼobuŋugi.
8 O Musengwa, yinyoha otiine mu hifo hihyo ehyʼohuŋumuliramo,
obemo nʼEsanduuku yʼEndagaano ahabonero ahʼobuŋangi wuwo.
9 Abasengi babo bahole ebiruŋamu
era leha abagwalaafu babo bembe nʼesangaalo.”
10 Hu lwʼomuŋeeresa wuwo Dawudi,
otahubba muutu wuwo oyu wajuhaho amafuta, omugongo.
11 Musengwa galayirira Dawudi
oweyamo obu ataŋanga hubbwaga gamuloma ati,
“Nja huŋamba mulala hu basaani babo mute hu tebe yiyo eyʼobuŋugi.
12 Singa abaana babo bahuuma endagaano yange nʼebiragiro ebi mbaŋa,
abaana baawe baja hwihala
hu tebe yiyo eyʼobuŋugi emirembe nʼemirembe.”
13 Hiri hiityo olwohuba Musengwa getobosamo Sayuuni
ohuba ehifo hihye ehyʼohumenyamo.
14 Galoma ati, “Hino njʼehifo
hyange omu naŋuumulirenga emirembe nʼemirembe
ŋano nja aŋa siimire ohuŋugiranga.
15 Nja hujofumulira Sayuuni ekabi eja hiisi hiitu,
abagadi baja hulyanga hiisi ehi benda.
16 Nja huŋa abasengi baamo ekabi mu hiisi ehi bahola
era abagwalaafu abahirimo baja husangaalanga.
17 Mu hifo hino paŋa ndifuulira mulala hu basaani ba Dawudi ohuba habaha owʼamaani.
Era omutobole wange aliba hyʼetaala eyitasima.
18 Nja huŋambya abalabe babe esoni
aye owahabaha wuwe wulihulahulana era wafuma.”