135
1 Mujumirye Musengwa.
Mujumirye Musengwa,
mumujumirye, enywe abaŋeeresa ba Musengwa,
2 enywe abemeerera baŋeeresa mu nyumba ya Musengwa,
mu lunya lwʼenyumba ya Hatonda weefe.
3 Mujumirye Musengwa olwohuba mulaŋi.
Mumwembere etendo olwohuba ehyo hisangaasa.
4 Musengwa gatobola Yakobbo ohuba wuwe,
Yisirayiri ohuba hyʼomuŋendo hihye.
5 Manyire ti Musengwa wʼamaani,
era ti Musengwa weefe asinga abahatonda bosibosi amaani.
6 Musengwa ahola hiisi ehigenda ohuhola
mwigulu oba hu hyalo, mu nyanja nomu buliba.
7 Agima ebireri byenyohera hu njuyi josijosi ejʼehyalo,
aŋindiha ohumyasa nʼefula
era atusaayo hibuyaga ohuŋwa mu sitoowa jije.
8 Galeetera abaseere abadaayi abʼe Misiri,
abaana abaseere abadaayi nʼebisolo ohufa.
9 Gaŋindiha ebyamaliholiho nʼebyeŋunjisa hu baatu bʼe Misiri
ohusoosa habaha nʼabahungu babe bosibosi.
10 Gasihiirisa amawanga mangi
era giita nʼabahabaha abʼamaani,
11 Sihoni habaha wʼAbamooli,
ni Ogi habaha wʼe Bbasani,
nʼabahabaha bosibosi abʼe Kanani.
12 Era ehyalo hyawe gahiŋayo ngʼomuŋuluko,
omuŋuluko eyiri abaatu babe Abayisirayiri.
13 O Musengwa, oliŋo emirembe nʼemirembe
era efuma yiyo Musengwa yija huba yʼemirembe nʼemirembe.
14 Musengwa aja hwejeeresa abaatu babe
era aŋambire abaŋeeresa babe ehisa.
15 Ebi mawanga gajumirya,
bibbote ebi bahola mu feeza nʼezaabbu
era abaatu njʼababibbota nʼemihono jaawe.
16 Biri nʼeminwa aye sibiroma
biri nʼemoni aye sibibona.
17 Biri nʼamatwi aye sibiŋulira
era sibiŋeera nʼohuŋeera.
18 Ababiwumba balifaanana hya nibyo,
hiityo pohiri ni naabo bosibosi ababitamo owesige.
19 Enywe olulyo lwa Yisirayiri mujumirye Musengwa.
Enywe abʼolulyo lwʼAlooni, mweyaase Musengwa.
20 Enywe abʼolulyo lwa Leevi, mweyaase Musengwa,
enywe abatya Musengwa, mweyaase.
21 Mujumirye Musengwa mu Sayuuni,
mujumirye oyo amenya mu Yerusaalemu.
Musengwa gebasiwe.