136
1 Mweyaase Musengwa olwohuba mulaŋi,
ohwenda huhwe hubitiirifu emirembe nʼemirembe.
2 Mweyaase Hatonda wa bahatonda,
ohwenda huhwe hubitiirifu emirembe nʼemirembe.
3 Mweyaase Musengwa wʼabasengwa,
ohwenda huhwe hubitiirifu emirembe nʼemirembe.
4 Niye yeŋene njʼahola ebyeŋunjisa,
ohwenda huhwe hubitiirifu emirembe nʼemirembe.
5 Owahola egulu mu magesi gage,
ohwenda huhwe hubitiirifu emirembe nʼemirembe.
6 Owata ehyalo hu maaji,
ohwenda huhwe hubitiirifu emirembe nʼemirembe.
7 Owahola ebyaduha ebibbala,
ohwenda huhwe hubitiirifu emirembe nʼemirembe.
8 Owahola eryuba liŋugenga mu muusi,
ohwenda huhwe hubitiirifu emirembe nʼemirembe.
9 Owahola omwesi nʼemunyeenye biŋugenga mu wiire,
ohwenda huhwe hubitiirifu emirembe nʼemirembe.
10 Oyo owiita abaana abaseere abadaayi e Misiri,
ohwenda huhwe hubitiirifu emirembe nʼemirembe,
11 ngʼatusa Abayisirayiri e Misiri,
ohwenda huhwe hubitiirifu emirembe nʼemirembe,
12 nʼamaani amangi nʼobuŋangi,
ohwenda huhwe hubitiirifu emirembe nʼemirembe.
13 Gaabula mu Nyanja Enando ŋabiri,
ohwenda huhwe hubitiirifu emirembe nʼemirembe.
14 Era gatusayo Abayisirayiri baabita mu nyanja eyo,
ohwenda huhwe hubitiirifu emirembe nʼemirembe.
15 Ne gasihiirihisa Falaawo nʼeŋe lirye mu Nyanja Enando,
ohwenda huhwe hubitiirifu emirembe nʼemirembe.
16 Oyo owatangirira abaatu babe mu lulafu,
ohwenda huhwe hubitiirifu emirembe nʼemirembe,
17 owasihiirisa abahabaha abʼamaani,
ohwenda huhwe hubitiirifu emirembe nʼemirembe.
18 Era geeta abahabaha abaali ni bamanyiheene,
ohwenda huhwe hubitiirifu emirembe nʼemirembe,
19 Sihoni habaha wʼAbamooli,
ohwenda huhwe hubitiirifu emirembe nʼemirembe,
20 ni Ogi habaha wʼe Bbasani,
ohwenda huhwe hubitiirifu emirembe nʼemirembe.
21 Era ehyalo hyawe gahiŋa abaatu babe ngʼomuŋuluko,
ohwenda huhwe hubitiirifu emirembe nʼemirembe,
22 ohuba muŋuluko gwa Yisirayiri omuŋeeresa wuwe,
ohwenda huhwe hubitiirifu emirembe nʼemirembe.
23 Eyiri oyo owatuhebulira ni hwali banafu era ni batunyooma,
ohwenda huhwe hubitiirifu emirembe nʼemirembe
24 gatununula ohuŋwa mu balabe beefe,
ohwenda huhwe hubitiirifu emirembe nʼemirembe.
25 Oyo aŋa ebitonde byosibyosi emere,
ohwenda huhwe hubitiirifu emirembe nʼemirembe.
26 Mweyaase Musengwa owomwigulu,
ohwenda huhwe hubitiirifu emirembe nʼemirembe.