139
Yʼomutangirisi wʼabembi. Ezabbuli ya Dawudi.
1 O Musengwa, wanjehebeeja
era wumanyire.
2 Omanyire nimba ni nihaaye oba nimba ni nemereeye
era ko peege hu hiitu oba ohimanyire.
3 Wutegeera amagendere nʼamaŋumulire gange,
ebi kola byosibyosi obimanyire.
4 O Musengwa, mbanga kiiri huloma,
oba ohenire ohumanya ehi nja huloma.
5 Wuneswanigirihiise enjuyi josijosi
amaani gago njʼobuhuumi wange.
6 Ohumanya ohuwumanyiremo hubitiirifu
era hubita aŋa koma ohuhutegeera.
7 Ŋeena aŋa panga ohutiina nehweha hu Mwoyo wuwo?
Era ŋeena aŋa panga ohudulumira aŋa otali?
8 Singa tiina mwigulu eyo oliyo,
nolu tiina ŋaasi e magombe, yoosi oliyo.
9 Nolu nguluha nabisya ebuŋwalyuba,
oba namenya aŋale eyo ebugwalyuba,
10 ni neeyo kwagaanayo ohutangirira,
omuhono gugo omulungi guja hunjeeda.
11 Singa ndoma ti,
“Mu butuufu ehiirema hija hukweha,
era enjase eyineswanigirihiise yafuuha hiirema,”
12 nʼehiirema ehyo sihija huba hiirema eyi oli,
olwohuba hu ewe, owiire buli hyomuusi
era ehiirema hiri hyʼenjase.
13 Watonda hiisi hitundu hyʼomubiri gwange,
ndiiwe owamumba mu hida hya maama.
14 Kujumirya olwohuba waatonda mu ngeri eyeŋunjisa,
ebi ohola byeŋunjisa era ehyo kimanyire bulaŋi weene.
15 Amagumba gange ni baali ni bagatonda
mu ngiso mu hida hya maayi yange, ewe wamanya
16 wambona ni kiiri husaaliwa.
Endaalo jange josijosi bajiŋandiha mu hitabo hihyo ni kiiri nahubaŋo.
17 O Hatonda, ebi wupeegaho nga byamuŋendo bugali
era nga sibibaliha!
18 Singa naali wahubibala, byahasingire embehe jʼomujehe obungi.
Era aŋa sisimuhira mba kiiri ni neewe.
19 O Hatonda, singa wiita abahosi bʼebibi!
Mupwereŋo, enywe abaŋemba hu hwita.
20 Bahulomaho nʼebigendererwa ebibi,
abasigu babo bahulomaho ebyʼobudulingi.
21 O Musengwa, ese caawa abahucaawa
era nyooma abahusoosa.
22 Eŋuma hindi ehi ndi ni nahyo ohutusaho ohubacaawa,
mbaŋira ohuba balabe bange.
23 O Hatonda, njehebeeje,
ngesesye omanye ebiŋeego byange.
24 Bona hanye ŋaliŋo aŋa ndi nʼekenyera mu bulamu wange,
ohene butangirire mu ngira eyʼobulamu owʼemirembe nʼemirembe.