140
Yʼomutangirisi wʼabembi. Ezabbuli ya Dawudi.
1 O Musengwa, nunule mu baatu abahosi bʼebibi,
kuume eyiri abatemu.
2 Abayiiya etegeha embi mu myoyo jaawe
era hiisi obuhya baleeta etalo.
3 Ebi baloma biruma hyʼobusagwa wʼetemu,
hyʼobusagwa wʼefulugundu.
4 O Musengwa, nunule mu mihono jʼabahosi bʼebibi,
taase mu batemu abehobana ohukubbiraŋo.
5 Abaatu abepaahapaaha baategire omutego mu ngiso,
banjuluhiise olutuula lwawe benda bapambye mu ngira omu mbita.
6 Ndoma Musengwa ti, “Oli Hatonda wange.”
O Musengwa, ŋulira ohwerira hwange wunjeede.
7 O Musengwa Omwene Buŋangi,
omunoŋosi wange owʼamaani,
engabo yange mu lutalo.
8 O Musengwa, ababi otabaŋa ebi benda
olwohuba baŋanga behudumbasa.
9 Otaleha balabe bange ohupangula,
leha ebibi ebi banyendesa bibagobolere abeene.
10 Leha amanda agekeeka gabagweho,
leha bagwe mu muliro, mwiroŋo eri batalisobola huŋwamo.
11 Abaloma ebyakalebule hu bahyawe batabitamo,
leha ebiŋeeriŋeeri bibasihiirise.
12 Manyire ti Musengwa agayira abagadi
era asolerera abali mu wetaavu.
13 Hituufu abagwalaafu baja huhujumirya
era abahola ebiruŋamu balimenya ni neewe.