141
Ezabbuli ya Dawudi.
1 O Musengwa, kweriririra nja mangu wunjeede.
Ŋulira ejanjaasi lyange ni kulanga.
2 Leha ohusaba hwange hwole eyi oli hyʼobubbaani,
leha ohugolola emihono jange hube hyʼeŋongo eyi baŋayo egulo.
3 O Musengwa, njeede ohusengeeja ebibono byange,
ŋuga olulimi lwange.
4 Leha omwoyo gwange gutagotanira mu hibi
ohwenyigira mu bikolwa byʼabahosi bʼebibi,
leha talya hu binoli byawe.
5 Leha omuutu omugwalaafu gapemo endabusi,
aba gandagire ehyere.
Anakangavula, hiba hyʼamafuta agʼekabi hu mutwe gwange, sinja hugaana
olwohuba mu husaba hwange, soosa ebikolwa bya bahosi bʼebibi.
6 Balidanya abaŋugi baawe ŋaasi ohuŋwa ŋamugulu hu lusozi
era abahola ebibi balimanya baati ebi ndoma byolerera.
7 Ngʼolu boŋaania eroba ni balima,
nʼamagumba geefe baligoŋania hu magombe.
8 Aye O Musengwa Omwene Buŋangi,
emoni jange njitaaye hu ndiiwe,
ndiiwe omuneŋogoma, otandeha hufa.
9 Kingirise emitego eji bategire,
ohuŋwa mu lutuula olu bahosi bʼebibi baategire.
10 Leha abahosi bʼebibi abeene bagwe mu mitego jaawe eji bategire,
ese ni nebitira hwebitira.