145
Ezabbuli eyʼohutenderesa. Ya Dawudi.
1 Nja huhugulumisanga ewe Hatonda wange era Habaha wange,
nja huhwebasanga emirembe nʼemirembe.
2 Nja huhweyaasanga hiisi ludaalo,
nja huhugulumisanga emirembe nʼemirembe.
3 Musengwa ali nʼamaani era asaana eŋono bugali
olwohuba wʼamaani ohusinga ngʼolu baatu bahitegeera.
4 Abaatu aba hiisi mulembe baja huhutenderesanga olwʼebikolwa bibyo,
baja huloma hu byamaliholiho bibyo.
5 Baja huloma hu ŋono nʼamaani gago
era nja huŋeeganga hu biitu bibyo ebyeŋunjisa ebi ohola.
6 Abaatu baja hulomanga hu byeŋunjisa ebyʼamaani ebi ohola
era nja hulangirira ti oli wʼamaani.
7 Baja hulomanga hu bulaŋi wuwo
era baja hwemba hu wawufu wuwo ni basaŋalya.
8 Musengwa ali nʼehisasabirisi nʼehisa
alwaŋo ohusunguŋala era ali nʼohwenda ohubitiirifu.
9 Musengwa mulaŋi eyiri abaatu bosibosi
era aŋambira ebitonde byosibyosi ebi gatonda ehisa.
10 Musengwa ebitonde byosibyosi biija huhweyaasanga,
abagwalaafu babo baja huhutenderesanga.
11 Baja hulomanga hu ŋono lyʼobuŋugi buwo,
baja huŋayanga hu buŋangi buwo,
12 abaatu bosibosi bahamanya ebyʼamaani ebi ohola,
nʼeŋono lyʼobuŋugi wuwo.
13 Obuŋugi wuwo sibuja huŋwaŋo
era owahabaha wuwo wʼemirembe nʼemirembe.
Musengwa mwesigwa mu ebi gasuubisa
era ali nʼehisa mu byosibyosi ebi ahola.
14 Musengwa ayeeda abo bosibosi abali mu bugosi,
era genyosa abo abaŋaasi.
15 Ebitonde byosibyosi birengerera ndiiwe ohubiyeeda
era obiŋa emere mu hiseera.
16 Ojanuula engalo
nga hiisi hiitu hisuna ehi hyetaaga.
17 Musengwa mwawufu mu byosibyosi ebi ahola
era ali nʼehisa hu byosibyosi ebi gatonda.
18 Musengwa ali ŋaapi ni naabo abamwegayirira,
abo bosibosi abamwegayirira mu mazima.
19 Goheresa ohuyayaana hwabo abamuŋa eŋono,
aŋulira ohwerira hwawe gabanoŋola.
20 Musengwa ahuuma abo bosibosi abamwenda
aye abahola ebibi bosibosi ali basihiirisa.
21 Najumiryenga Musengwa
leha ebitonde bibye byosibyosi
byebasa Hatonda omwawufu emirembe nʼemirembe.