144
Ya Dawudi.
1 Gebasiwe Musengwa olwanda lwange
otendeha emihono jange ohusoola
nʼenjala jange ohwetegehera olutalo.
2 Musengwa ganyenda ehibitiiriye
njʼengabo yange era njʼomuneŋogoma,
njʼomununuzi wange oyu nesiga ohukuuma.
Aŋamba amawanga gosigosi gagata ŋaasi wʼamagulu gange.
3 O Musengwa, omuutu njʼani ohuba ti omulabirira
era omwana wʼomuutu njʼani ohuba ti omuŋeegaho?
4 Omuutu ali hyʼomuuya obuuya
endaalo jije jiri hyʼehisisigo ehitalwa hugotaŋo.
5 O Musengwa, ŋwa mwigulu liryo wiihe
era ŋamba hu sozi, jiduunye eriisi.
6 Ŋindiiha ohumyasa abasigu babo basasaane.
Balase obusaale buwo obafulumuse.
7 Januula omuhono gugwo ohuŋwa mwigulu
wununule era wuponie ohuŋwa mu buŋangi wʼabalugendwa,
8 abejuuye obudulingi
era abalayira ebyʼobudulingi.
9 O Hatonda wange, nja huhwembera olwembo olunyaaha
nʼogutongooli ogwʼewaaya ehumi.
10 Ndiiwe aŋa abahabaha obuŋangusi,
onunula Dawudi omuŋeeresa wuwe ohutafa piima.
11 Nunule era ponie ohuŋwa mu buŋangi wʼabalugendwa,
abejuuye obudulingi era abalayira ebyʼobudulingi.
12 Hino hija huleetera abasaani beefe mu buvubuka waawe ohuba bʼomuhulo hyʼomuloofe.
Era nʼabahaana beefe baliba hyʼebisindi ebiŋoono ebyʼohujolijinja olubiri.
13 Ebyagi byefe birijula amakungula aga hiisi ngeri.
Etaama jeefe jirisaalagana emidudu nʼemidudu, ekumi nʼekumi.
14 Eŋombe jeefe jisalagane ekasi nʼesinde,
ŋaŋumeŋo ejisumula,
era ŋaŋumeŋo maliro olwʼenaku mu nguudo jeefe.
15 Besiimire abaatu abo aba hino hiŋambaho.
Besiimire abaatu abo abali ni Musengwa nga Hatonda waawe.