143
Ezabbuli ya Dawudi.
1 O Musengwa, ŋulira ohusaba hwange,
ŋulira ohwerira hwange,
ŋulira wupambire ehisa, mu wawufu wuwo
ŋulira ohwerira hwange, ngobolemo ngʼolu oli mwesigwa.
2 Otasalira muŋeeresa wuwo musango humusinga
olwohuba eŋuma muutu ahola ebiruŋamu mu moni jijo.
3 Omulabe ali humbinga gafulyafulihiisya mwiroba
era agira ni menya mu hiirema hyʼabaafa ahale.
4 Ehyo hireetera obulamu wange ohunafuŋa
era omwoyo gwange mweralihirifu.
5 Kebulira endaalo ejahale peega hu byosibyosi ebi wahola,
ebi wahola nʼemihono jijo.
6 Kugololera emihono jange ni saba,
omwoyo gwange guhuli nduŋo, hyʼeroba eriŋalahaaye olwʼohuŋuma amaaji.
7 O Musengwa, ngobolemo mangu
olwohuba poyeemo amaani.
Otakubba mugongo, kanda naaba hyaba batiina e magombe.
8 Hiisi mu mugamba kebulisenga ohwenda huhwo ohubitiirifu olwohuba nesiga ndiiwe.
Ndage engira eyi ndi nʼohugenderamo olwohuba ndiiwe oyu ndengereeye ohutangirira.
9 O Musengwa, nunule ohuŋwa mu balabe bange
olwohuba ndiiwe omuneŋogoma.
10 Somese ohuhola ebi wenda olwohuba ndiiwe Hatonda wange.
Mwoyo wuwo omulaŋi gatangirire mu ngira enuŋamu.
11 O Musengwa, olwʼesiina liryo,
huuma obulamu wange mu wawufu wuwo, tuse mu bigosi.
12 Olwʼohunyenda obugali,
ŋolereesa abalabe bange,
sihiirisa abalabe bange bosibosi olwohuba ndi muŋeeresa wuwo.