147
1 Mujumirye Musengwa.
Nga hiraŋi ohwemba ni hujumirya Hatonda weefe,
nga hisangaasa era hyolana ohumujumirya.
2 Musengwa agaluhamo ohutongola Yerusaalemu,
ahumbaania Abayisirayiri abasasaanira mu buŋaŋanguse.
3 Aŋonia abʼemyoyo ejibbwagijihire
era abasidiha nʼebbandeji hu birwaye.
4 Njʼasalaŋo obungi wʼemunyeenye,
josijosi gajiguliha amasiina.
5 Musengwa weefe muhulu
ali nʼobuŋangi bungi era amagesi gage sigahoma.
6 Musengwa genyosa abeŋomeha
aye afulabihisya abahosi bʼebibi ŋaasi.
7 Mwembere Musengwa ni mumweyaasa
mwembere Hatonda weefe nʼahatongooli.
8 Awiiha ebireri hwigulu,
atonyesa efula hu hyalo, amesa enyaasi hu sozi.
9 Aŋa ebisolo ebyohulya,
nʼowaana wa nahinywamalwa ni wulirira emere, awuŋa.
10 Amaani gʼembalaasi sinje agamusangaasa
oba obusira wʼabasirikale.
11 Musengwa asangaala olwʼabo abamutya,
abo abasuubirira mu hwenda huhwe ohubitiirifu.
12 O Yerusaalemu, ŋa Musengwa eŋono
ewe Sayuuni tendereza Hatonda wuwo
13 olwohuba ahuuma ebisindi byʼenjigi jijo
era aŋa abaana benywe ekabi.
14 Aleeta emiyaaya ohweswanigirisa esalo jijo
era ahuŋa engaano ehira obulaŋi.
15 Aŋindiha ehiragiro hu hyalo,
ehibono hihye higenda mbiro nawangu.
16 Ganjala amabaale gʼefula oti hani mooya gʼetaama
era adumuusa ehisuusu oti hani gohe.
17 Adumuusa amabaale gʼefula hyʼepuli,
njʼani aŋanga ohugumira obuŋololohi obu aŋindiha?
18 Alagira hulagira byasanuuha.
Aŋindiha omuuya gugwe ngʼamaaji gahuluhuta.
19 Ahwehuliiye Yakobbo ehibono hihye,
amagambi nʼebiragiro bibye eyiri Abayisirayiri.
20 Hino sahiholerangaho gwanga lindi lyosiryosi
era sibamanyire magambi gage.
Mujumirye Musengwa.