148
1 Mujumirye Musengwa.
Enywe abali mwigulu, mujumirye Musengwa,
mumujumirye ŋamugulu mu bbanga.
2 Abamalayika babe mwesimwesi mumujumirye,
eŋe lyomwigulu mumujumirye.
3 Mumujumirye, enywe eryuba nʼomwesi,
mumujumirye, enywe emunyeenye josijosi ejimeregenya.
4 Mumujumirye, enywe egulu eryaŋamugulu obugali
nʼamaaji agali ŋamugulu mu bbanga.
5 Leha byosibyosi ebyo bijumirye Musengwa
olwohuba galagira hulagira nga bibaaŋo.
6 Gabita mu bifo byabyo ohubaamo emirembe nʼemirembe,
era ehiragiro hihye hyʼemirembe nʼemirembe.
7 Enywe ebitonde hu hyalo, mujumirye Musengwa,
enywe ebitonde ebyomu nyanja nʼobuliba wʼagayanja.
8 Enywe ehimyaso hyʼefula nʼamabaale gaayo,
obuŋololohi nʼebireri ni hibuyaga bigondera ehiragiro hihye.
9 Enywe esozi nʼengingi josijosi,
emisaala ejaama ebibala nʼemitumba josijosi,
10 enywe esolo ejomwisugu nʼejaŋango josijosi,
ebyeŋalula nʼenyuni ejiguluha,
11 abahabaha hu hyalo nʼamawanga gosigosi,
enywe abatangirisi nʼabaŋugi hu hyalo mwesimwesi,
12 enywe abosuho nʼabajoŋu,
abasaahulu nʼabaana abaŋere.
13 Ebitonde byosibyosi ebyo bijumirye Musengwa,
olwohuba nje yeŋene asaana,
eŋono lirye bitiirifu ohuhiraho ehyalo nʼegulu.
14 Aŋaaye abaatu babe obuŋangusi,
abagwalaafu babe bosibosi bahamuŋa eŋono,
Abayisirayiri bali hu mwoyo gugwe.
Mujumirye Musengwa.