25
Ya Dawudi.
1 O Musengwa, kuŋambya omwoyo gwange.
2 O Hatonda wange, kwesiga otandeha huswala.
Era otaleha balabe bange ohupangula.
3 Ŋaŋuma ahwesiga aja ohuswala
aye abo abekwe baliswala ni ŋaŋuma hyʼohweŋambya.
4 O Musengwa, ndage ebi wenda kole,
somese ohugendera mu magira gago.
5 Somese era butangirire mbeŋo mu mazima gago
olwohuba ndiiwe Hatonda omunoŋosi wange,
era ndiiwe oyu nesiga habuhyabuhya.
6 O Musengwa, hebulira ngʼolu bundagire ehisasabirisi nʼohwenda huhwo ohubitiirifu,
olwohuba byaŋwa ahale nahale.
7 Otahebulira ebibi nʼobujeemu owomu buvubuka wange.
Olwʼohwenda huhwo ohubitiirifu, kebulire olwohuba Musengwa oli mulaŋi.
8 Musengwa mulaŋi era ahola ebiruŋamu
olwʼehyo asomesa abahosi bʼebibi amagira gage.
9 Atangirira abawombeefu ohuhola ebiruŋamu
era abasomesa ebi genda bahole.
10 Hiisi hiseera Musengwa nʼowesigwa nʼohwenda,
atangirira abo abahuuma endagaano yiye era bagondera ebiragiro bibye.
11 O Musengwa, olwʼesiina liryo
soniŋe ebibi byange wayire bingi.
12 Njʼani atya Musengwa?
Aja humulaga engira eyi ali nʼohugenderamo.
13 Musengwa aja humuŋanga ebiraŋi mu bulamu wuwe wosiwosi.
Era abejuhulu babe balisikira ehyalo hino.
14 Musengwa alomeraho abo abamutya ebyama bibye,
era abasomesa ebiri mu ndagaano yiye.
15 Emoni jange njitaaye hu nje Musengwa.
Era aja hununula mu bigosi.
16 O Musengwa, cuuha wukejeho,
saasire olwohuba ndimu hiŋubaalo era mbonaabona.
17 Ebigosi mu bulamu wange byeyongeeye ohwala,
nunule mu bigosi.
18 Bona ebiguudyo nʼohubonaabona ohu ndimo,
soniŋe ebibi byange byosibyosi.
19 Bona abalabe bange ngʼolu beyongeeye obungi
era ngʼolu bacaawiiye erala.
20 Kuume era wuponie,
otandeha huswala olwohuba ndiiwe oyu nesiga.
21 Ekola enuŋamu nʼamazima gange biitaase
olwohuba Musengwa, ndiiwe oyu nesiga.
22 O Hatonda, nunula Abayisirayiri
mu bigosi byawe byosibyosi.