27
Ya Dawudi.
1 Musengwa njʼenjase yange era njʼOmunoŋosi wange,
njʼani oyu nja hutya?
Musengwa njʼahuuma obulamu wange,
njʼani aja hutiisa?
2 Ababi ni banumba ohwenda ohunjita,
era abalabe bange banumba,
baja hwegumula, nga bagwa.
3 Wayire eŋe eramba lineswanigirisa,
mu mwoyo gwange sinja hutya,
omwoyo gwange siguja hutya.
Wayire olutalo lugwaŋo hu ese, sigala ni ndi mugumu.
4 Hirala ehi sunga Musengwa era ehi nenda obugali
era ehiitu ehyo cʼehino ti, nahaba mu nyumba ya Musengwa
obulamu wange wosiwosi, ohweboneranga obuŋoono wa Musengwa,
nʼohusaba mu Yekaalu yiye.
5 Hiri hiityo olwohuba mu biseera ebigosi,
aja hukuumira mu weema yiye
era aliita ŋamugulu hu lwanda.
6 Nja huŋangula abalabe bange abaneswanigirihise.
Ndiŋaayo eŋongo mu Weema yiye enjawufu nindi nʼesangaalo.
Nja hwemba ni njumirya Musengwa.
7 O Musengwa, ŋulira ejanjaasi lyange ni kulanga
pambire ehisa, bungobolemo.
8 Mula mu mwoyo gwange, pulira ni wundoma oti, “Njumirye.”
Olwʼehyo, Musengwa nja huhujumirya.
9 Otanjehwehaho, otabbinga muŋeeresa wuwo nʼobusungu.
Ndiiwe omuyeedi wange, otandehaŋo oba wakubba omugongo,
O Hatonda omunoŋosi wange!
10 Wayire bbaabba ni maama bandehaŋo
aye Musengwa aja hundabiriranga.
11 O Musengwa, somese ebi wenda kole,
tangirire mu ngira enduŋamu olwohuba ndi nʼabalabe bangi.
12 Otapayo eyiri abalabe bange,
olwohuba abajulizi abʼobudulingi banjenyoheyeeho nʼobuhambwe.
13 Aye nehahasa ti nja hubona ngʼolu Musengwa
ali mulaŋi mu bulamu wahatyane.
14 Wesige Musengwa, galuhamo amaani era guma omwoyo,
ohuumirire Musengwa ohuhuyeeda.