28
Ya Dawudi.
1 O Musengwa, olwanda lwange,
ŋulira ohusaba hwange, otagaana hupulirisa olwohuba singa oŋolera huŋoleera,
nja huba hyʼabatiina emagombe!
2 Ŋulira ohulira hwange, pambire ehisa,
kulomba ohunjeeda, ni paniha emihono jange eyiri ehifo hihyo Ehyawufu Obugali.
3 Otapirira ŋalala nʼabahosi bʼebibi ni naabo abahola ebibi,
baloma nʼabaliranwa baawe bulaŋi hu mugulu,
aye mu myoyo jaawe bejuuye obucaayi.
4 Begalule olwʼebikolwa byawe nʼolwebibi byawe ebi bahola.
Baŋe epeera esaanira emirimo jaawe, baŋe ehyo ehi basaana.
5 Ngʼolu bataŋira ebi Musengwa ahola ngʼehibbala,
aja hubasihiirisa batagobolayo huboneha nindi.
6 Musengwa gebasiwe
olwohuba aŋuliiye ohulira hwange gapambira ehisa.
7 Musengwa njʼamaani era njʼengabo yange,
mwesiga era ganjeeda.
Omwoyo gwange gubinuha nʼesangaalo
era nja humweyaasa ni nemba.
8 Musengwa njʼaŋa abaatu babe amaani,
njʼehyehwehero hyʼobunoŋosi owʼomuutu wuwe oyu gajuhaho amafuta.
9 Noŋola abaatu babo era obaŋe ekabi,
obe mwayi waawe era obalabirirenga emirembe nʼemirembe.