29
Ezabbuli ya Dawudi.
1 Muŋe Musengwa eŋono, enywe ebitonde ebyomwigulu,
muŋe Musengwa eŋono olwʼamaani gage.
2 Muŋe Musengwa eŋono,
muhubbe amafuha mu moni jʼohira Owawufu nʼeŋono.
3 Ejanjaasi lya Musengwa liŋulirihana hu nyanja,
Hatonda owʼeŋono abbwabbwanuha hu nyanja josijosi.
4 Ejanjaasi lya Musengwa lyʼamaani,
ejanjaasi lya Musengwa lyengunjisa bugali!
5 Ejanjaasi lya Musengwa libbwaga emisaala eʼjamaani,
Musengwa abbwaga emisaala ejʼe Lebbanooni ejʼamaani.
6 Agira esozi jʼe Lebbanooni nʼolusozi Hamoni
byatuumatuuma hyʼenyana yʼeŋombe.
7 Ejanjaasi lya Musengwa
liŋwamo endimi ejʼomuliro.
8 Ejanjaasi lya Musengwa litengesya olulafu,
Musengwa atengesya olulafu lwʼe Kadesi.
9 Ejanjaasi lya Musengwa litengesya emitumba,
ligira amahoose gʼemisaala mu madeŋo gakukumuha.
Era hiisi muutu mu Yekaalu yiye alomera ŋamugulu ati, “Oŋeewe eŋono!”
10 Musengwa aŋuga amataba
Musengwa aŋuga nga Habaha emirembe nʼemirembe.
11 Musengwa aŋa abaatu babe amaani,
Musengwa aŋa abaatu babe emiyaaya.