30
Ezabbuli. Olwembo. Olwohuŋongayo e Yekaalu. Ya Dawudi.
1 Nja huhutenderesa Musengwa, olwohuba wununuuye,
ndoleha balabe bange huneyagaliraho.
2 O Musengwa Hatonda wange,
nahweriririra ohunjeeda era waponia.
3 O Musengwa, waatusa emagombe
waponia ohutiina emagombe.
4 Enywe abagwalaafu
mwembere Musengwa, mumutenderese.
5 Obusungu wuwe wʼehiseera buseera,
aye ehisa hihye hyʼemirembe nʼemirembe.
Amasiga gabaaŋo owiire
aye esangaalo liija mu mugamba.
6 Ni naali ni puma ehinduma naloma ti,
“Ŋaŋuma ehija hutengesya.”
7 O Musengwa, olwohuba waali wufuuye wʼamaani hyʼolusozi oluleeŋi.
Ne ni wanjehweha, neralihirira.
8 O Musengwa, nahweriririra,
negayirira Musengwa gapambire ehisa.
9 Hyamugaso hi ese ohufa
ese ohutiina emagombe?
Efuuhe lija huhujumiryanga?
Lija hulangiriranga owesigwa wuwo?
10 O Musengwa, ŋulira wupambire ehisa,
O Musengwa, njeede.
11 Ohunakuŋala hwange ohufuuye huhina.
Wutuhiseeho ehigwali wanyambasa esangaalo hyʼehyambalo
12 ko nahahwembera ni taŋoleera.
O Musengwa Hatonda wange,
nahweyaasenga emirembe nʼemirembe.