31
Yʼomutangirisi wʼabembi. Ezabbuli ya Dawudi.
1 O Musengwa, ndiiwe omuneŋogoma, otandeha huswala.
Ohola ebiruŋamu, nunule.
2 Tegere ohutwi yanguŋaho wununule ba pungulu yange omunehweha,
ofuuhe ebaale eringadirira.
3 Ngʼolu oli ndiiwe olwanda lwange omuneŋogoma
era ehifo omundulumira ohusuna obuhuumi,
olwʼesiina liryo tangirire era wunduŋamye.
4 Ponie omutego ogu baategire,
olwohuba neŋogoma mu ndiiwe.
5 Kuŋambya omwoyo gwange,
O Musengwa nunule
ewe Hatonda omwesigwa.
6 Caawa abo abajumirya ebinambulamo,
ese nesiga Musengwa.
7 Nja husangaala era saŋalye olwʼehyere hihyo
olwohuba omanyire ohubonaabona nʼenaku yʼobulamu wange.
8 Siiwupayo mu mihono jʼabalabe bange
aye wumboŋolooye netaaye.
9 O Musengwa, pambire ehisa olwohuba ndi mu bigosi.
Emoni jange jejuuye amasiga era omwoyo nʼomubiri gwange bijuuye enima.
10 Obulamu wange wijuuye hubonaabona hwoŋene.
Era mwaha hu mwaha, ndi mu hubonaabona hubonaabona.
Amaani gapooye olwʼehibi hyange,
era amagumba gange ganafuŋire.
11 Abalabe bange bosibosi banjerega.
Abaliranwa bange banjenyinyalya,
abameeri bange baatya era ni bambona hu ngira, banduluma.
12 Banjebiriiye oti hani nafa hale,
nafuuha hyʼolujo.
13 Pulira bangi ni bangeya, esisi yineswanigirihise.
Basalira oluhwe era banesoomera ohunjita.
14 Aye kwesiga ewe Musengwa,
era ndoma ti, “Ndiiwe Hatonda wange.”
15 Obulamu wange buli mu mihono jijo,
nunule mu mihono jʼabalabe bange, abo abakiyaania.
16 Pambire ehisa
ese omuŋeeresa wuwo,
noŋole olwʼohwenda huhwo ohubitiirifu.
17 O Musengwa, otandeha huswala, kweriririiye.
Ne leha ababi baŋemuhe era balambagale emagombe.
18 Leha obudulingi waawe weete aŋalafu
olwohuba bali nʼamalala nʼohujerega,
baloma ni banyomoola abo abahola ebiruŋamu.
19 Ebiraŋi bibyo ebi otegeheeye abahutya, nga bingi!
Hiisi muutu amanyire ngʼolu oli mulaŋi,
ngʼolu ohuuma abo abahwesiga.
20 Obahweha wabafumbeerera ohubaŋonia ekwe jʼabaatu.
Obahuumira aŋa oli ŋaŋume ehibolaho
wabaŋonia ebibono ebyʼobudulingi.
21 Musengwa aŋeewe eŋono
olwohuba gandagire ehisa hihye ehyeŋunjisa,
ni naali mu hibuga abalabe ni baneswanigirihise
wandaga ngʼolu wunyenda ehibitiiriye.
22 Nahubba enduulu ni ndoma ti,
“Wumbingire ohuŋwa mu moni jijo!”
Aye waŋulira ni nahweriririra wunjeede.
23 Mwende Musengwa
enywe mwesimwesi abagwalaafu babe.
Musengwa ahuuma abamwesiga
aye abehudumbasa ababoneresa ngʼolu hisaanira.
24 Mube nʼamaani era mugume emyoyo
enywe mwesimwesi omuli nʼesuubi mu Musengwa.