32
Ya Dawudi. Masikili.
1 Gesiimire oyo oyu basoniŋa ebibi bibye
oyu bawiiha hu bibi bibye.
2 Gesiimire oyo oyu Musengwa atabalaho bibi ebi aholire
era aŋumamo budulingi.
3 Ni naali ni cigeene ohwatula ebibi byange,
amagumba gange ganafuŋira erala
olwʼohulira ohunabangamo ni talehera.
4 Wamboneresanga omuusi nʼowiire, naŋwamo amaani
ngʼolu maaji gomeera mu biseera byʼehyeya.
5 Nga mbutula ebibi byange eyi oli era sinahweha bubi wange.
Naloma ti, “Nja hwatulira Musengwa ebibi byange,”
era waasoniŋa ebibi byange byosibyosi.
6 Olwʼehyo, hiisi muutu ahujumirya ahweŋe alombe nʼohiboneha.
Mu butuufu amataba ni galiija sigalisobola humwolaho.
7 Ndiiwe ehyehwehero hyange,
oja hukuuma ohutagwa mu bigosi
era oja huupa olwembo olwʼobuŋangusi.
8 Nga Musengwa aloma ti,
“Nja huhulaga engira eyohugenderangamo.
Nja huhusomesa era nja huhulabirira.
9 Mutaba hyʼembalaasi oba nasugirya ejiŋumamo magesi,
era ejenda ohujitaamo ehyoma nʼoluhoba ko jaahola ehi oba ni wenda jihole.”
10 Abahosi bʼebibi bali nʼohubonaabona hungi,
aye Musengwa genda ehibitiiriye abaatu abamwesiga.
11 Musangaale era musaŋalye hulwa Musengwa,
enywe abahola ebiruŋamu,
enywe mwesimwesi abagwalaafu mu myoyo, mwembe.