33
1 Enywe abagwalaafu mwembere Musengwa nʼesangaalo,
hiraŋi enywe abamugondera, ohumujumirya.
2 Mujumirye Musengwa nʼahatongooli,
mumwembere ni muhubba ogutongooli ogwʼewaaya ehumi.
3 Mumwembere olwembo olunyaaha, mumwembere nʼobuhugu,
era mwembere ŋamugulu nʼesangaalo.
4 Hiri hiityo olwohuba ehibono hya Musengwa hyʼamazima era hituufu,
sigehubbira mu byosibyosi ebi ahola.
5 Musengwa genda obuluŋamu nʼohutehubbira,
ehyalo hijuuye ohwenda huhwe ohubitiirifu.
6 Musengwa galagira hulagira, egulu lyatondewa,
nʼebirimo byaholewa nʼehibono hihye.
7 Ahumbaania amaaji agʼomunyanja ŋalala gaaba hyʼagali mu songo.
Abunga amaaji agomu njuho gaaba oti mu sitoowa.
8 Ehyalo hyosihyosi hitye Musengwa,
abaatu bosibosi hu hyalo bamuŋe eŋono,
9 olwohuba galoma huloma, ngʼehyalo hibaaŋo.
Galagira hulagira ehyalo hyaŋandalala.
10 Musengwa afafagania etegeha jʼamawanga,
agumbaasa ebigendererwa byʼabaatu.
11 Aye etegeha ja Musengwa jibaaŋo emirembe nʼemirembe,
ebigendererwa byʼomwoyo gugwe bibaaŋo emirembe josijosi.
12 Lyesiimire egwanga eri Musengwa aŋuga nga nje Hatonda walyo
abaatu abagatobola ohuba ababe.
13 Musengwa nʼali mwigulu alengera ŋaasi
gabona abaatu bosibosi.
14 Hu tebe yiye eyʼobuŋugi abona
bosibosi abali hu hyalo.
15 Oyo njʼawumba emyoyo jʼabaatu,
era njʼamanyire ehi hiisi muutu ahola.
16 Ŋaŋuma habaha aŋangula olwʼobungi weŋe lirye
era ŋaŋuma musooli aŋona mu lutalo olwʼamaani gage omwene.
17 Hiŋuma mahulu ohwesiga embalaasi ohuhununula.
Wayire yiri nʼamaani mangi,
siŋanga huŋonia omuutu mu lutalo.
18 Aye Musengwa ahuuma abo abamutya,
abo abasuubirira mu hyere hihye ehingi,
19 abaŋonia ohufa era abahuuma ni bali balamu
mu biseera ebyʼenjala.
20 Huhuumirira ni huli nʼesuubi mu Musengwa,
njʼatubeera era njʼengabo yeefe.
21 Atuleetera ohusaŋalya,
olwohuba hwesiga esiina lirye eryawufu.
22 Musengwa, leha ohwenda huhwo ohubitiirifu hube hu efe,
ni hweyongera ohuhutaamo esuubi.