34
Ya Dawudi. Olu geŋwitania ati atabuhire omutwe mu moni ja Abbimereki owa mubbinga gatiina.
1 Nja hwebasanga Musengwa hiisi hiseera
era namujumiryenga ni talehera.
2 Nja hujumirya Musengwa
olwʼebi ahola era leha ababonaabona baŋulire bahasaŋalya.
3 Hutenderese Musengwa,
leha humujumirihisye ŋalala.
4 Neŋunderera Musengwa era gangobolamo,
gaanunula mu byosibyosi ebyali ni bitiisa.
5 Abo abamwesiga bameregenya basuna esangaalo
era sibaliswala wayire lulala.
6 Omugadi gamusunga gamuŋulira,
gamutusa mu bigosi byosibyosi ebi galimo.
7 Malayika wa Musengwa
geswanigirisa abo abamutya era abanunula.
8 Mugesesye waheega oti Musengwa mulaŋi.
Gesiimire oyo adulumira eyi ali
amuhuume mu bigosi.
9 Mutye Musengwa enywe abagwalaafu babe
olwohuba abamutya eŋuma hiitu hyosihyosi ehi badamba.
10 Wayire epologoma ejʼamaani jisobola ohuhaya ehyohulya enjala yajiruma
aye abo abeeŋa Musengwa eŋuma hiraŋi ehi bahaya.
11 Baana bange, muje muŋuliirise,
nja hubasomesa engeri eyʼohuŋamo Musengwa eŋono.
12 Hiisi muutu hu enywe owenda obulamu
era owegomba ohuwangaala,
13 ali nʼohuhuuma olulimi lulwe ohutalimirira bahye
nʼohutaloma ebyʼobudulingi.
14 Era alehere aŋo ohuhola ebibi ahole ebiraŋi,
abe omuutu aleeta emiyaaya era geyongere mu jo.
15 Emoni ja Musengwa jiri hu abo abahola ebiruŋamu
era aŋulira ohusaba hwawe.
16 Aye aŋahania abo abahola ebibi
Musengwa abalengerera nʼobuhambwe,
ohubasihiirihisa erala eŋume hubahebulira hu hyalo.
17 Abahola ebiruŋamu beŋunderera Musengwa gabaŋulira,
abaŋulira gabanunula mu bigosi byawe byosibyosi.
18 Musengwa aba huupi ni naabo abanafuŋire mu myoyo jaawe
era anunula abo abaŋooyemo amaani nʼesuubi.
19 Omuutu ahola ebiruŋamu aŋanga ohuba nʼehibbiryo hyʼebigosi
aye Musengwa amununula mu byosibyosi.
20 Ahuuma amagumba gage gosigosi
sihulibbwagihaho wayire erala.
21 Ehibi hyʼomubi hija humuleetera ohufa,
abalabe baabo abagwalaafu balibaboneresa.
22 Musengwa anunula abaŋeeresa babe,
eŋuma wayire mulala hu bamwesiga oyu balisalira omusango.