35
Ya Dawudi.
1 O Musengwa, ŋiriŋana ni naabo abaŋiriŋana ni neese,
soola ni naabo abasoosa
2 ŋamba engabo etono nʼembala
winyoheremo bunjeede.
3 Ŋamba efumo nʼembasa oholoŋe abo abanyendula,
wundome oti, “Ndi Munoŋosi wuwo.”
4 Leha abo abenda ohunjita baswale
era abo abasala oluhwe ohukenaŋo
bibasobere bagoboleyo ni baswaye.
5 Leha babe hyʼomuhuuji ogu embeŋo ehubba yaŋira eyo,
malayika wa Musengwa nʼababbinga.
6 Leha engira yaawe yijuule ehiirema nʼobuterere,
Malayika wa Musengwa nʼababbinga.
7 Ngʼolu baatega omutego gwawe aŋaŋuma songa,
era ngʼolu banjabira eroŋo mbo ngwemo,
8 hibaŋiranga hu lunya olugalamu basirihiira eyo ni batamanyire
era nʼomutego ogu baatega gubaŋambe abeene
bagwe mwiroŋo eryo basihiirihe.
9 Ndisangaala olwa Musengwa
era ndisaŋalya olwʼobunoŋosi wuwe.
10 Nʼomwoyo gwange gwosigwosi ndiroma ti, “O Musengwa,
njʼani ali hyʼewe? Onunula abagadi mu banamaani,
abagadi era abali mu wetaavu,
obaŋonia abo ababanyagulula.”
11 Abajulizi abʼobudulingi betusaayo,
basidihaho ebiitu ebitamanyire.
12 Basasula ehibi olwʼebiraŋi ebi kola
era ŋaŋuma owundiho.
13 Atenga ni baali balwaye, nambala ebigwali
era nabasabira ni siiba nʼohusiiba.
Ohusaba hwange ni hutagobolewamo,
14 hyapambya enaku oti hani
baali boluganda oba bameeri bange.
Nahotamya omutwe hyʼalira nyina.
15 Aye ni nʼali mu bugosi,
bosibosi basangaala era behumbaania ohunjeherera,
abaatu abatamanyire basalaho ebibono ni batalehera.
16 Banduulira hyʼabatamanyire Hatonda,
era baluma emba olwange.
17 O Musengwa, olyosa ŋe ohuŋoleera huŋoleera nʼotanjeeda?
Ponie olufuluuto lwawe, ponie epologoma jino.
18 Nja huhweyaahisa mu luhumbaano olubba,
era nja huhujumirihisya mu duuli lyʼabaatu.
19 Otaganya balabe bange ohusaŋalya ni ŋaŋuma songa,
otaleha abo abacaawira wereere,
otabaganya huminanira moni ni basangaalira enaku yange.
20 Endoma yaawe yebboogo,
era bahola gwohuŋayirisa abo abaŋuma songa.
21 Bahayaana baati,
“Hwabona ehi wahola.”
22 O Musengwa, bino byosibyosi obiweene,
otaŋoleera huŋoleera.
O Musengwa otamba ŋaleeŋi.
23 Yinyoheramo wungayire.
Soolere, Hatonda wange era Musengwa wange.
24 Mu buluŋamu wuwo, langirira oti mbulaaho musango,
O Musengwa Hatonda wange, otabaganya hunjeha.
25 Otabaleha huŋeega baati,
“Otyo, hufunire ehi hwenda.”
Oba “Oyo humufunire.”
26 Leha abo bosibosi abasangaalira enaku yange,
baswale era bataŋambagana.
Leha abo bosibosi abanepaahiraho,
esoni jibahubbe.
27 Leha abo abasangaala olwʼese ohuŋumaho musango
bahubbe ebigalagala olwʼesangaalo nʼohusaŋalya,
era hiisi hiseera balome baati, “Musengwa atenderesewe,
asangaala omuŋeeresa wuwe nʼali bulaŋi.”
28 Olulimi lwange luja hulomanga hu buluŋamu wuwo
nʼetendo liryo oludaalo lwosirwosi.