36
Yʼomutangirisi wʼabembi. Ya Dawudi omuŋeeresa wa Musengwa.
1 Omuhosi wʼebibi gegaana Hatonda mu mwoyo gugwe
era sibamuŋa ŋono, hiisi hiseera aŋeega hu huhola hibi.
2 Omwene gebona ati waŋamugulu,
era aŋeega mbo Hatonda saaja humuboneresa olwʼebibi bibye.
3 Ebibono bibye bibi era byabudulingi,
ebiitu ebi ahola sibyamagesi era sibiraŋi.
4 Nohu buliri wuwe aba muhusala magesi huhola ebibi,
sigenda hulehaŋo ohuhola ebibi.
5 Musengwa, ohwenda huhwo hubitiirifu,
hubbala era hwola hwigulu,
owesigwa wuwo butuumaho ebireri.
6 Owabufu wuwo buli hyʼesozi embala,
ohutehubbira huhwo huleeŋi hyʼenjuho eyʼamaani mu nyanja.
O Musengwa, olabirira abaatu nʼebisolo.
7 O Hatonda, ohwenda huhwo hubitiirifu,
sihuhoma era sihuguliha,
abegingihiriri nʼabaŋaasi beŋogoma mu mabaŋa gago.
8 Balya hu bingi ebyomu nyumba yiyo,
era obaŋa ebyʼohunywa ebihuluhuta hya maaji gomu lwabi.
9 Ndiiwe esibuho yʼobulamu,
olwʼenjase yiyo husobola ohubona enjase.
10 Yeyongere ohulaga ohwenda huhwo eyiri abo abahumanyire,
nʼobutukirivu wuwo obulage abo abali nʼemyoyo ejihola ebiruŋamu.
11 Otaganya abehudumbasa ohunumba,
oba abahosi bʼebibi ohumbinga.
12 Bona abahosi bʼebibi ngʼolu balambagaaye,
baguuye ŋaasi sibasobola nʼohwinyoha.