40
Yʼomutangirisi wʼabembi. Ezabbuli ya Dawudi.
1 Nahuumirira Musengwa nʼobugumiikiriza,
gaŋulira ngʼagobolamo ohwerira hwange.
2 Gaatusa ohuŋwa mu madosi mwiroŋo eritiisa
nga ganjemeeresa hu lwanda gaagira nagenda ni tagwa.
3 Gaapa olwembo olunyaaha olwembo olwohujumirya Hatonda wange.
Bangi baja hubona batye era besigenga Musengwa.
4 Gesiimire omuutu owesiga Musengwa, atesiga abo abepaahapaaha
era abagotera mu hujumirya ebinambulamo.
5 O Musengwa Hatonda wange, oholire ebyamaliholiho bingi, eŋuma owʼohuhugerageraniaho.
Ŋaŋuma asobola ohwanja ebiitu ebi otegehire ohutuholera gahenayo,
bingi bugali weene sibibaliha era nolu nahagehisyeho ohubibala sinahasoboye.
6 Siwendire birabo nʼeŋongo
eŋongo eyi bohya ehwiye lyaguguliha
ni neeryo eri baŋaayo olwʼebibi siwabisiima
ne waapa ohutwi ohuhuŋulira.
7 Ngʼaŋo ndoma ti, “Nijire ohuhola ebi osiima
ngʼolu bapandiihaho mu Byaŋandiihiwa.
8 O Hatonda wange, nenda ohuhola ebi osiima,
amagambi gago bagaŋandiiha mu mwoyo gwange.”
9 O Musengwa, ndangirira owawufu wuwo mu luhumbaano olubba.
Sinja huhiŋoleraho ngʼolu omanyire.
10 Mu luhumbaano lwʼabaatu babo sipolera hu bunoŋosi wuwo.
Ndangirira ebiŋamba hu hwenda nʼowesigwa wuwo.
11 O Musengwa, otalehera hupambira hisa hihyo
leha ohwenda nʼamazima gago bikuumenga habuhyabuhya.
12 Hiri hiityo olwohuba ebigosi eduuli bineswanigirihise
ebibi byange bipinga era binjigaaye emoni.
Bihira efiiri johu mutwe gwange obungi
era omwoyo gwange gunafuŋire.
13 O Musengwa, hihusangaase wununule
O Musengwa, yanguŋaho wunjeede.
14 Leha abo abenda ohunjita baswale era hibagwemo abeene nʼabeene.
Leha abo abasangaalira ohufafagana hwange bagameyo ni bawomboŋaaye.
15 Leha abo abakondyola bagameyo ni baswaye olwohuba baloma baati,
“A a! Hwahulomera!”
16 Leha abo bosibosi abahwendula basangaale era basaŋalye olwʼewe,
era leha abo abenda ohunoŋoha balomerenga ŋamugulu baati,
“Musengwa aŋeewe eŋono!”
17 Ndi mugadi era ndi mu wetaavu,
Musengwa kusunga wupeegeho.
Ndiiwe obunjeeda era ndiiwe omununuzi wange.
O Hatonda wange, otalwa ohunjeeda!