41
Yʼomutangirisi wʼabembi. Ezabbuli ya Dawudi.
1 Gesiimire oyo alumirwa abagadi,
Musengwa amuŋonia mu biseera ebigosi.
2 Musengwa aja humuhuuma
era aliŋonia obulamu wuwe
aja humuŋa ekabi mu hyalo
era saaja humuŋaayo mu mihono jʼabalabe babe.
3 Musengwa aja humuhuuma nʼalwaye
era aja humuŋonia obulwaye.
4 Naloma ati, “O Musengwa, pambire ehisa,
ponie olwohuba nonoona mu moni jijo.”
5 Abalabe bange bebuusa baati,
“Alifa ŋaali, bamwerabire hu hyalo?”
6 Hiisi owuuja ohumbonaho
gaja hukema hya muhanwa
ni gagamayo, nga ko abyanja.
7 Abalabe bange bosibosi bahubba owaama,
banyendesa bibi byereere era baloma baati,
8 “Obulwaye obumuluma wʼamaani
saaja hugangamuha huŋwa hu buliri.”
9 Ni meeri yange oyu neesiganga,
oyu nalyanga ni naye hu hiiŋulo hirala, gacuuhiiye.
10 Aye Musengwa, pambire ehisa
era ponie sobole ohubesasusa ebi bakola.
11 Manyire ti kwesiimisa
era omulabe wange sasobola hupangula.
12 Ohuumi re obulamu wange olwohuba kola ebiraŋi
era nja huba mu moni jijo emirembe nʼemirembe.
13 Gebasiwe Musengwa Hatonda wa Yisirayiri
emirembe nʼemirembe.
Amiina era Amiina.