42
Yʼomutangirisi wʼabembi. Olwembo lwʼabaatu bomu lulyo lwa Koora.
1 Ngʼolu enjobe yirahalaha ni yenda ohunywa amaaji,
O Hatonda, nʼomwoyo gwange guutyo poguhuyayaanira.
2 Omwoyo gwange guŋemba hu Hatonda Omwene Bulamu.
Nahatiine ŋaali ohuba aŋali Hatonda?
3 Amasiga agandira mu muusi nʼowiire njʼemere yange.
Abaatu bambuusa hiisi hiseera baati,
“Hatonda wuwo ali ŋeena ohuhuyeeda?”
4 Neŋunamira ni kebulira ngʼolu nagendanga nʼehibbubbu hyʼabaatu,
ni kitangirira ohutiina mu nyumba ya Hatonda ni bahubba ebigalagala era ni beyaasa.
5 Lwahiina neŋunamira?
Lwahiina omwoyo gwange gugulungutana?
Esuubi lyange ndita mu Hatonda
olwohuba ndigobolamo namujumirya, oyo omunoŋosi wange
6 era Hatonda wange.
Omwoyo gwange gweŋunamiiye
olwʼehyo nja huhuhewulira mu hyalo hyʼe Yoludaani
nohu ngingi jʼe Herumooni ohuŋwa hu lusozi Mizali.
7 Naŋandi ŋano, obutahi owʼamaani bunduma
wuli hyʼamaaji agayomboha ŋaasi,
wuli hyʼamayengo gʼamaaji agaŋolomboga
ni gaŋindigana ni gatabaala ŋaasi.
8 Musengwa olaga ohwenda huhwo ohubitiirifu mu muusi,
mu wiire mbe nʼolwembo olu nemba,
lube saala eyiri Hatonda owʼobulamu wange.
9 Ndoma Hatonda olwanda lwange ti,
“Lwahiina bunjibiriiye?
Lwahiina ngenda ni neŋunamiiye olwʼabasigu abakiyaania?”
10 Ebiduho ebi banduha bikenireemo amaani era basiiba ni bambuusa baati,
“Hatonda wuwo ali ŋeena?”
11 Lwahiina neŋunamira?
Lwahiina omwoyo gwange gugulungutana?
Esuubi lyange ndita mu Hatonda olwohuba ndigobolamo namujumirya,
oyo omunoŋosi wange era Hatonda wange.