46
Yʼomutangirisi wʼabembi. Olwembo lwʼabaatu bomu lulyo lwa Koora. Ohutiinira hu alamosi.
1 Mu Hatonda njomu hweŋogoma era njʼamaani geefe
njʼatuyeeda hiisi hiseera ni huli mu bigosi.
2 Ehyo njʼehitugumya wayire ehyalo hinateetemenga sihuja hutya
era wayire esozi jinasiguhenga jedaanya mu buliba wʼenyanja,
3 wayire amaaji mu nyanja ganaŋolombogenga gatumbeera
nʼesozi jateetema olwʼetiisa eyo.
4 Ŋaliŋo olwabi oluliho emyombe ejireeta esangaalo mu hibuga hya Hatonda,
ehifo ehyawufu omu Ali Ŋamugulu Obugali amenya.
5 Hatonda ali mu hibuga ehyo era sihiritenga.
Bulihya mu mugamba pwipwipwi Hatonda gahiyeeda.
6 Amawanga gejuuye ohutya era owahabaha wuŋwaŋo
Hatonda awaatuha ngʼehyalo hisanuuha.
7 Musengwa Omwene Maŋe ali ni neefe,
hweŋogoma mu Hatonda wa Yakobbo.
8 Muuje mubone ebi Musengwa aholire
mubone ebyeŋunjisa ebi aholire hu hyalo.
9 Ahenaŋo etalo mu hyalo hyosihyosi,
abbwaga obusaale era afoomafooma amafumo goohya engabo nʼomuliro.
10 Nʼalagira ati, “Mubunjeere era muhimanye muuti ndiise Hatonda
baja huupa eŋono mu mawanga gosigosi
baja huupa eŋono mu hyalo hyosihyosi.”
11 Musengwa Omwene Maŋe ali ni neefe,
hweŋogoma mu Hatonda wa Yakobbo.