45
Yʼomutangirisi wʼabembi. Ohwemba ni batiinira hu ejanjaasi “Lyʼebimuli.” Lwʼabaatu bomu lulyo lwa Koora. Olwembo lwʼobugole.
1 Omwoyo gwange gwituluha ebiraŋi ni nembera habaha ebi seega
olulimi lwange lusengeja ebibono hyʼekalaamu yʼomuŋandiisi haŋunye.
2 Ndiiwe omusinde omuŋoono ohira abandi bosibosi
era omanyire ohuloma olwohuba Hatonda gahuŋa ekabi ejʼemirembe nʼemirembe.
3 Wefiihe epiima yiyo hu nduuhu ewe owʼamaani amangi.
Yambala engoye endaŋi ejʼomutangirisi.
4 Mwiŋono liryo oŋanguuye
hulwa amazima, obuwombeefu nʼowawufu.
Leha omuhono gugwo ogwʼamaani guhole ebiitu ebitiisa.
5 Lasula obusaale wuwo owoogi bufumite emyoyo jʼabalabe ba Habaha.
Leha ogaluse amawanga mu buŋangi wuwo.
6 O Hatonda, owahabaha wuwo buja hubererera emirembe nʼemirembe.
Era oja huŋuga abaatu babo nʼotehubbira.
7 Wenda obutukirivu aye ocaawa ehibi.
Olwʼehyo, Hatonda wuwo ahutobooye
mu bahyo era gahuta mu hifo ehyʼeŋono
ehiitu ehija huhuŋweramo esangaalo ohuhiraho abahyo.
8 Ebyambalo bibyo ebyʼobuŋugi biŋunya ahaloosa aha miira nʼaha alowe naha kasiya.
Mu mbuga eji batimbire amasyaka ebifuga bihusangaasa.
9 Mu bahasi abahulabirira mulimo nʼabahaana ba habaha.
Hu muhono gugwo omulungi pohuli omumbeja owambaaye ezaabbu ehira obulaŋi ohuŋwa mu Ofiri.
10 Muhaana, ŋuliirisa era faayo hu ebi ndoma
yibirira abalebe babo nʼabomu hiha hihyo.
11 Obuŋoono wuwo wuŋirire omwoyo gwa habaha.
Muŋe eŋono olwohuba nje musengwawo.
12 Abaatu bʼe Tiiro balihuleetera ebirabo
nʼabaŋinda balyehoyahoya ni benda obasiime.
13 Omumbeja ali mu lubiri era gejuuye eŋono.
Ehyambalo hihye batungiraho ezaabbu.
14 Mu byambalo ebigohobe obulaŋi bamuŋerehera ewa habaha
abahaana bahye abataŋenyuhangaho nʼomusinde bamuŋerehera era bali humuhuleetera.
15 Bali humuleeta mu sangaalo nʼohusaŋalya
ni bengira mu lubiri lwa habaha.
16 Abaana babo balisikira abasehulu baawe
oli bafuula baŋugi mu hyalo hyosihyosi.
17 Nja huleetera abaatu abʼemirembe josijosi ohuhuhebuliranga
era olwʼehyo amawanga gosigosi ganahujumiryenga emirembe nʼemirembe.