44
Yʼomutangirisi wʼabembi. Olwembo lwʼabaatu bomu lulyo lwa Koora.
1 O Hatonda, hwaŋulira nʼamatwi geefe
abasehulu beefe ni batuŋayira ebyamaliholiho
ebi wahola halehale mu mulembe gwawe.
2 Watambisa obuŋangi wuwo wabbinga amawanga omu watongosa abasehulu beefe.
Wasaaŋasaaŋa abanamawanga ngʼoŋa abasehulu beefe efuma.
3 Ohuŋangula amawanga sihyali lwa bisoosa byʼabasehulu beefe abeene.
Sihyaŋwa hu maani gaawe abeene hyaŋwa mu maani gʼomuhono gugwo omulungi nʼobuŋangi wuwo.
Ohubaaŋo huhwo mu njase yiyo
nʼohwenda ohu wabendamo byabaŋangusa.
4 Ndiiwe habaha wange era Hatonda wange,
oyeeda abaatu ba Yakobbo ohuŋangula.
5 Olwʼobuŋangi wuwo, huŋangula abalabe beefe,
olwʼewe, huniinirira abatulumba.
6 Sinesiga hasaale hange,
era epiima yange sinje egira naŋangula.
7 Ne ndiiwe otuŋa ohuŋangula abasigu beefe,
era oswasa abatucaawa.
8 Oludaalo lwosirwosi hwenyumikirihisa mu ndiiwe Hatonda
era hunahujumiryenga emirembe nʼemirembe.
9 Aye ŋaahani otuhubbire omugongo era otwihiise ŋaasi
sohitiina mu lutalo nʼamaŋe geefe.
10 Waagima hwaduluma abalabe beefe
era abasigu banyaga ebyefe.
11 Watuŋayo batunawuujule hyʼetaama
era otusalanihisiiye mu mawanga.
12 Watunda abaatu babo hu bbeeyi eyaŋaasi
omuŋuma ehi wasunamo.
13 Otufuuye eduho eyiri abaliranwa beefe
ehiitu ehi abatweswanigirihiise batala.
14 Otufuuye ehiitu ehyohwenyinyalya eyiri abanamawanga,
abaatu banyeenya emitwe ni batunyooma.
15 Basiiba ni banyooma,
era nijuuye huswala.
16 Eriyo abo abakayuhira ni banduulira
olwʼomulabe owefumbiririiye hu hwesasusa.
17 Ebyo byosibyosi bitwolireeho wayire sihuhwibiriranga
oba ohubbwaga endagaano eyi wahola ni neefe.
18 Mu myoyo jeefe sihuhuŋwangaho
era sihujemeranga biragiro bibyo.
19 Aye watuleha mu gasolo eŋuma otuyeeda
watudanyirira mu hiirema ehiŋambire ti ngungungu.
20 Singa hwali hwibiriiye Hatonda weefe
oba ni hujumirya hatonda omugwira,
21 Hatonda amanyire ebyama ebiri
mu myoyo jʼabaatu, sigahahimanyire?
22 Atenga hiisi ludaalo batwehoyera ohutuhenaŋo hu lulwo.
Batubisya hyʼetaama eyi baja husala.
23 O Musengwa, yinyoha lwahiina oŋenyuha?
Yinyoheramo, otatudanyirira watiinirira!
24 Lwahiina otwehweha
wibirira ohubonaabona nʼohunyigirisiwa ohu hulimo?
25 Huguuye mu fuuhe,
emibiri jeefe jiŋwereeye ŋaasi.
26 Yinyoha otuyeede,
tununule olwʼohwenda huhwo ohubitiirifu.