48
Olwembo. Ezabbuli yʼabaatu bomu lulyo lwa Koora.
1 Musengwa ali nʼeŋono eryʼamaani asaniiye ohumujumirihisyanga
mu hibuga hya Hatonda weefe hu lusozi lulwe olwawufu.
2 Sayuuni lusozi luŋoono era luleetera ehyalo hyosihyosi esangaalo.
Olusozi Sayuuni hibuga hya habaha owʼeŋono.
3 Hatonda alagire ati omwene njʼomuhuumi
wʼabaatu abomu hibuga ehyo.
4 Abahabaha beŋimba
ohuwaagala ehibuga Sayuuni.
5 Ne ni bahibona beŋunja
era batya bafulumuha.
6 Emama yabaŋambira eyo
era baali mu bulumi hyʼomuhasi owenda ohusaala.
7 Wabasihiirisa hyʼamaato gʼe Talusiisi
aga muyaga ogwʼebuŋwalyuba gwabbwagabbwaga.
8 Ebi hwaŋuliranga mbebi huweene mu hibuga hya Musengwa Omwene Maŋe mu hibuga hya Hatonda weefe,
Hatonda ahihuuma emirembe nʼemirembe.
9 O Hatonda, ni huli mu Yekaalu yiyo
huŋeega hu hwenda huhwo ohubitiirifu.
10 O Hatonda, abaatu hiisi ŋaatu bahujumirya
efuma yiyo ehwene mu hyalo hyosihyosi era oŋuga nʼotehubbira.
11 Leha abaatu bomu Sayuuni basangaale
abaatu bomu Buyudaaya basaŋalye olwohuba osala emisango nʼotehubbira.
12 Mugende mu Sayuuni muhyeswanigirise
mubale eminaala ejirimo.
13 Muhaŋaase era mwetegerese ebirimo
ko mwahaŋayira abʼomulembe oguuja muuti,
14 Hatonda nje Hatonda weefe emirembe nʼemirembe
era njʼanatutangirirenga ohwola olu hulifa.