49
Yʼomutangirisi wʼabembi. Ezabbuli yʼabaatu bomu lulyo lwa Koora.
1 Hiisi muutu aŋulire hino
abaatu mwesimwesi mu hyalo hino muŋuliirise,
2 abegingihiriri nʼabaŋaasi nʼabaŋinda nʼabagadi.
3 Nja huloma ebibono ebyʼamahulu
era ebi muja huŋulira ohuŋwa mu mwoyo gwange
bija hubafuula abaatu abali nʼohutegeera.
4 Nja hwetegeeresa engero
njinyonyole mu lwembo ni kubba ahatongooli.
5 Mu biseera ebigosi sinja hutya
wayire abalabe bange banjeswanigirisa,
6 abo abesiga obuŋinda waawe
era abepaaha olwʼobuŋinda waawe obubitiirifu.
7 Eŋuma muutu aŋanga ohununula omuutu wahye,
wayire aŋanga ohusasula Hatonda amuhuuma.
8 Obulamu wʼebbeeyi bugali
era eŋuma aŋanga ohugulirira,
9 asobole ohuwangaala era atafa.
10 Hiisi muutu ahibona ti nʼabagesi boosi bafa,
abaŋubeebe nʼabaŋuma ehi bategeera boosi basihiiriha
era balehera abandi obuŋinda waawe.
11 Amagombe gaawe gaja husigala ni gali njʼamago gaawe endaalo josijosi,
pomu balimenya emirembe nʼemirembe
nʼolu baliba nʼebyalo ebiri mu masiina gaawe.
12 Aye omuutu nʼolwaba muŋinda atye sihimugaana hufa
era alisihiiriha hyʼebisolo.
13 Ehyo njʼehyola hu abo abaŋeega ti behena
ni naabo ababesiga era babehirihisamo.
14 Boosi bali nʼohufa hyʼetaama era olumbe lulibalya.
Bulihya abagwalaafu babaŋuga
era sibaligobolayo humenya mu mayumba gaawe agʼomutindo.
15 Aye Hatonda aja huununula ohuŋwa emagombe,
mu butuufu omwene alipira ewuwe.
16 Hitahubisyanga bubi singa omuutu asuna obuŋinda obubitiirifu
singa obuŋinda buwe weyongera obungi
17 olwohuba nʼalifa eŋuma ehi alitiina ni nahyo
era saalitiina emagombe nʼeŋono lirye.
18 Wayire omuutu geranga wʼekabi
era abaatu bamupaaha olwʼobuŋinda
19 aye ali tiina geŋimba hu basehulu babe
abataligaluhamo hubona hu lyuba.
20 Omuutu omuŋinda aŋuma hutegeera
yeesi wahusihiiriha hyʼesolo.