50
Ezabbuli yʼAsafu.
1 Hatonda Omwene Buŋangi, Musengwa alanga ehyalo hyosihyosi ohwehumbaania
ohuŋwera erala ebuŋwalyuba ohwola ebugwalyuba.
2 Hatonda amasamasa ohuŋwa mu Sayuuni ehibuga ehiŋoono
era hyaduhirira hyʼeryuba.
3 Hatonda weefe alihuuja saaja huŋoleera era omuliro
ni gumutangiriyeemo ni hibuyaga atiisa amweswanigirihiise.
4 Alanga egulu nʼehyalo ohuba bajulizi
nʼasalira abaatu babe emisango.
5 Aloma ati, “Humbaania abaatu bange
abaahola endagaano ni nange ni baŋayo eŋongo.”
6 Egulu lirangirira owawufu wuwe
olwohuba Hatonda omwene njʼomulamuzi.
7 “Baatu bange muŋulire era nja huloma enywe Abayisirayiri
nja hubaŋaaho obujulizi ndiise Hatonda, Hatonda wenywe.
8 Simbanenya olwʼeŋongo lyenywe oba olwʼeŋongo eyi bohya ehwiye
lyaguguliha eri muupa hiisi haseera.
9 Sinetaaga bunwa ejomu bidooli byenywe
oba embusi ejomu lugo lwenywe.
10 Hiri hiityo olwohuba esolo josijosi ejomwisugu jange
era hiisi ŋombe ejiri hu sozi olukumi, jange.
11 Manyire hiisi nyuni eyiri hu sozi
era hiisi hitonde mwisugu, hyange.
12 Ni nahali njala sihyetagisa hubalomera
olwohuba ehyalo nʼebihirimo byosibyosi byange.
13 Ndya nyama jʼebunwa
oba nywa amafugi gʼembusi?
14 Mulehe ohweyaasa hwenywe hube njʼeŋongo lyenywe eyiri Hatonda
era mwoherese oweyamo wenywe eyiri oyo Ali Ŋamugulu Obugali.
15 Onaba mu bigosi, ndange nja huhununula
era oja huupa eŋono.”
16 Aye Hatonda abuusa omuhosi wʼebibi ati,
“Lukusa hi olu oli ni nalwo ohuloma hu magambi gange oba ohuloma hu ndagaano yange?
17 Ocaawa ebi kulagira
era ebi ndoma obihubba omugongo.
18 Omwibi njʼoyu ohola ni naye omuhumba
era ohola omuhago nʼabahwedi.
19 Hiisi hiseera oloma bibi byereere
era ebibono bibyo bijuuye budulingi wereere.
20 Hiisi hiseera oba muhuloma hu mugandawo
era oloma hu mwana wa maawo.
21 Ebyo byosibyosi obiholire naŋoleera ngʼoŋeega oti ndi hyʼewe.
Aye nja huhuhangavula era kunenye moni hu moni.
22 Ŋulira hino, ewe owibirira Hatonda
nja huhunawujula mu bugusugusu ŋaŋume owʼohuhuyeeda.
23 Oyo aŋaayo eŋongo ohunjeyaasa aba gaapa eŋono
era mu butuufu nja humulaga obunoŋosi wa Hatonda.”