51
Yʼomutangirisi wʼabembi. Ezabbuli ya Dawudi eyi gaŋandiiha oluvanyuma lwa naabbi Nasani ohuhena ohuloma ni naye hu biŋamba hu Bbasuseebba.
1 O Hatonda, pambire ehisa olwʼohwenda huhwo ohubitiirifu.
Olwʼehisa hihyo ehibitiirifu kusunga osangule ebibi byange byosibyosi.
2 Njogeho ebibi byange byosibyosi,
ehibi hipweho tuhulire erala.
3 Manyire ti ndi mubbengi
era habuhyabuhya manyire ehibi hyange.
4 Nasunguŋasa ndiiwe wamwene.
Nahola ebibi mu moni jijo era cʼehigira ebyʼoloma ni biri byʼamazima,
era siwehubbira nʼosala emisango.
5 Mu butuufu ndi mubbengi ohuŋwera erala mu buŋere wange,
mubbengi ohuŋwera erala hu ludaalo olu nagwa mu hida hya maayi yange.
6 Mu butuufu ewe wenda omuutu owʼamazima
olwʼehyo somese ohuba mwesigwa mu mwoyo gwange.
7 Njogeho ni hayisopu era nja hufuuha mugwalaafu,
njoge tuhule ohuhiraho amabaale gʼefula.
8 Leha sangaale era saŋalye,
leha amagumba agʼobbwagire gasangaale.
9 Lehera aŋo ohuheja hu bibi byange
era tuseho ebibi byange byosibyosi.
10 O Hatonda, tondeemo omwoyo omugwalaafu
era ngobosemo bunyaaha omwoyo omwesigwa.
11 Otambinga ohuŋwa mu moni jijo,
oba watusaho Omwoyo wuwo Omutukuvu.
12 Ngobohese bunyaaha esangaalo eryʼobunoŋosi wuwo
era wuupe omwoyo ogwenda ohuhugondera.
13 Ehyo hija hundeetera ohusomesa ababbengi amagira gago
era baja hucuuha bagobole eyi oli.
14 O Hatonda, noŋole ohuŋwa mu butemu ewe Hatonda omunoŋosi wange
era nja hwemba ebiŋamba hu butukirivu wuwo.
15 O Musengwa, njeede sobole ohuloma
era nja hulangirira etendo liryo.
16 Eŋongo sinje erihusangaasa nahahuleteeye
eŋongo eyi bohya ehwiye lyaguguliha sinje lihwesiimisa.
17 Eŋongo eri Hatonda genda njʼomwoyo omugondi,
O Hatonda, sooja hutala omwoyo omugondi era omuwombeefu.
18 Heja hu Sayuuni nʼehisa
era oyeede otongole ebiteepe bya Yerusaalemu.
19 Oja husangaala abaatu ni bahuŋa eŋongo nʼomwoyo omulaŋi,
eŋongo eyi bohya ehwiye lyaguguliha
era baja huŋaayo ebunwa jʼeŋombe hu hituuti hihyo.