52
Yʼomutangirisi wʼabembi. Dyogo ohuŋwa mu Edomu olu gatiina eyiri Sawulo gamuloma ati, “Dawudi atiinire mu mago gʼAhimeleki.”
1 Lwahiina weranga owʼamaani wepaahapaaha olwʼebibi ebi ohola?
Lwahiina wepaahapaaha oludaalo lwosirwosi
aye Hatonda mwesigwa emirembe nʼemirembe.
2 Hiisi ludaalo oyiiya ohusihiirisa abahyo
era ebibono bibyo byogi hyʼekereta hiisi ehi oloma hya budulingi.
3 Onyumirwa ebibi ohuhira ebiraŋi
onyumirwa ohudulinga ohuhira ohuloma amazima.
4 Mudulingi ewe onyumirwa ohusihiirisa abahyo nʼebibono bibyo!
5 Mu butuufu Hatonda alihusihiirihisa erala.
Alihuŋamba gahudyedyesa ohuŋwa mu mago gago
aja huhuhuula ohuŋwa mu hyalo omu omenyire.
6 Abagwalaafu baja hubona era balitya
baja humujeherera baati,
7 “Bona omuutu owagaana ohwesiga Hatonda
aye geesiga obuŋida wuwe obubitiirifu
era gahulahulana olwʼohusihiirisa abahye.”
8 Aye ndi hyʼomusaala omuzayiti oguhulira mu nyumba ya Hatonda,
nesiga Hatonda olwʼohwenda huhwe ohubitiirifu ohwʼemirembe nʼemirembe.
9 Nja huhujumiryanga emirembe nʼemirembe olwʼebi oholire
nja huta esuubi lyange mu ewe olwohuba oli mulaŋi.
Nja huhujumirya mu luhumbaano lwʼabagwalaafu babo.