5
Yʼomutangirisi wʼabembi: abʼemirere. Ezabbuli ya Dawudi.
1 O Musengwa, tegere ohutwi
oŋulire ebi ndoma,
ŋulira ohubinda hwange.
2 Hatonda era Habaha wange,
ŋulira ohweririgana hwange.
3 O Musengwa, mu mugamba oŋulira ohusaba hwange,
mu mugamba kwanjulira ebi nenda wunjeede,
era nahuumirira ohungobolamo.
4 Sooli Hatonda asangaalira ehibi,
era hiisi ahola ehibi saaba bulala ni neewe.
5 Abepaahapaaha sibasobola hwemeerera mu moni jijo,
ocaawa bosibosi abahola ebibi.
6 Osihiirisa abo abaloma ebyʼobudulingi,
era Musengwa ocaawa abo abeeti nʼabadulingi.
7 Aye olwʼehisa hihyo ehibitiirifu,
nja hwingira mu nyumba yiyo,
sobole ohuhujumirya mu Yekaalu yiyo enjawufu.
8 O Musengwa, tangirire kolenga ehi wenda,
olwohuba ndi nʼabalabe bangi.
Ndage engira eyi ndi nʼohuŋamba.
9 Ebi balabe bange baloma sibituufu,
emyoyo jaawe jijuuye bibi byereere.
Ebi baloma biŋunya ehibulu hyʼehigombe,
ebi baloma bya budulingi.
10 O Hatonda, basalire omusango.
Bo abeene babe nja bagwa mu mitego jaawe.
Babbinge mu moni jijo olwʼebibi byawe ebingi,
olwohuba bahujeemera.
11 Aye leha abo bosibosi abadulumira eyi oli ohusuna obuhuumi basaŋalye,
leha bembenga olwʼesangaalo.
Huuma abo abahwenda bahaba nʼesangaalo.
12 O Musengwa, hiri hiityo olwohuba oŋa abahola ebiruŋamu ekabi.
Obeswanigirisa nʼehyere hihyo hyʼengabo.