6
Yʼomutangirisi wʼabembi: abʼemirere. Nʼebivuga ebyʼewaaya. Ohutiinira hu seminisi. Ezabbuli ya Dawudi.
1 O Musengwa, otakayula nʼobusungu,
oba wapaamo endabusi nʼehiruŋi.
2 O Musengwa, pambire ehisa olwohuba gapooye.
O Musengwa, ponie olwohuba amagumba ganduma bugali.
3 Ndi mweralihirifu bugali mu mwoyo gwange.
O Musengwa, olyosa ŋe, olyosa ŋe nʼotanjeeda?
4 O Musengwa, nja wununule
noŋole olwʼohwenda huhwo ohubitiirifu.
5 Eŋuma ahuhebulira nʼafuuye.
Njʼani ahujumirya nʼali emagombe?
6 Ohubinda olwʼobulumi hukenireemo,
owiire wosiwosi mbamu hulira
era mbandya amasiga hu buliri wange.
7 Olwʼohulira obugali emoni jange sijihiibona bulaŋi,
emoni jibona biroliroli olwʼamasiga aga balabe bange bandeteeye.
8 Mupwereŋo enywe mwesimwesi abahola ebibi
olwohuba Musengwa aŋuliiye ohulira hwange.
9 Musengwa aŋuliiye ohwerira hwange ni sunga ohusasira
era aŋuliiye ohusaba hwange.
10 Abalabe bange bosibosi baja huswala era baŋwemo amaani,
badulume ni bataheja yinyuma!