7
Sigayiyoni ya Dawudi eyi gembera Musengwa nʼatiinira hu Kuusi ohuŋwa mu hiha hya Bbenjamini.
1 O Musengwa, Hatonda wange, neŋogoma mu ndiiwe.
Noŋole era nunule mu baatu bosibosi abakiyaania,
2 otabaleha hudweduula hyʼepologoma
era nʼohungusulagusula ni ŋaŋuma wahuponia.
3 O Musengwa, Hatonda wange, ni mba ni nahola ehibi hyosihyosi
era ni mba ni nabbenga hu muutu yesiyesi,
4 oba ni nalya mu meeri yange oluhwe,
oba ni nahola ehibi hu mulabe wange aŋaŋuma songa yosiyosi,
5 ale leha omulabe wange gambinge ahene gapambe,
leha gafulyafulye mwiroba, ganjite era gandehe ni fuuye.
6 O Musengwa, yinyoha nʼobusungu,
osoose abalabe bange abahambwe.
O Hatonda, baaho nʼehi ohola, laga ohutehubbira.
7 Humbaania abaatu bosibosi bahweswanigirise,
obaŋuge ni weema mwigulu.
8 Leha Musengwa asalire abaatu omusango.
O Musengwa, njejeerese omusango ni weema hu biruŋamu ebi kola,
ni weema hu bugwalaafu wange, ewe Ali Ŋamugulu Obugali.
9 O Hatonda, omwawufu era ohebera emyoyo nʼebiŋeego,
simya ababi nʼebikolwa byawe,
ko abahola ebiruŋamu babe bulaŋi.
10 Hatonda Ali Ŋamugulu Obugali njʼengabo yange,
oyo anoŋola abo abamugondera.
11 Hatonda asala emisango nʼatehubbira,
habuhyabuhya aluŋira abahola ebibi.
12 Aja huŋagala epiima yiye singa sibegaluhaho,
era aja hutega omutego gugwe.
13 Ategehire ebisoosa bibye ebyʼobusagwa,
nʼohulasa obusaale owaduha omuliro.
14 Oyo owijuuye ehibi getegehire ohuhola ebibi
era hiisi ehi aloma hya budulingi.
15 Eroŋo eri weyabiiye
njʼerihulya ewe omwene.
16 Ebigosi ebi gendesa abahye,
bimugobolera omwene
ebibi bibye bimugobolera omwene.
17 Neyaasenga Musengwa olwohuba sigehubbira
era nembenga ohujumirya Musengwa Ali Ŋamugulu Obugali.